Aqtóbede dárigerler men naýqastar donor bolýdyń mańyzdylyǵyn sóz etti
AQTÓBE. QazAqparat -Aqtóbe oblysy boıynsha 300 adam búıregin, 60 adam baýyryn aýystyrý otasyn kútip júr. Búgin búıregin aýystyrǵandar men búıregi syr bergen naýqastar donor bolýdyń mańyzdylyǵyn aıtyp berdi, dep habarlaıdy QazAqparat tilshisi.
Aqtóbege «Ómir syıy» respýblıkalyq qoǵamdyq birlestiginiń ókilderi keldi. Transplantologııa, donor bolýdyń mańyzy týraly aıtylǵan jıynǵa búıregin aýystyryp, qalypty ómirge qosylǵandar men donor tappaı júrgender qatysty.
«Birlestik búıregi, baýyry jaramsyz kúıge túsip, donordyń kómegimen qalypty ómirge qaıta kelgen, donordy kútip júrgen adamdardan quralǵan. Meniń de eki búıregim aýyryp, apparatqa tańyldym. Keıin sáti túsip búıregimdi aýystyrdy. Maǵan máıittik donor ádisi paıdalanyldy. Qaza bolǵan adamdar basqa adamdarǵa ómir syılasa, onyń esh jamandyǵy joq dep oılaımyn. Donorlarǵa alǵysym sheksiz. Biz olardyń aldynda basıemiz»,- dedi respýblıkalyq qoǵamdyq birlestik prezıdenti Sandýǵash Orynbaeva.
Onyń sózinshe, naýqastarǵa kóbine baýyrlary donor bolady. Keıde týǵan-týystary kelisimin berip jatady.
«Donor tabý óte qıyn. Men eki ret sol múmkindikten aıyrylyp qaldym. Atyraýda turamyn, jol qashyq, Aqtóbege jete almadym. Bıyl apparatqa tańylǵanyma tórt jyl boldy. Óte qıyn. Biz sııaqty naýqas adamdar úshin ómir súrýdiń jalǵyz joly donor tabý bolǵan soń bul máselede adamdardyń keń bolǵanyn qalaımyz»,- dedi naýqas Rınat Sábıev.
Aıta keteıik, Aqtóbege arnaıy kelgen Ulttyq transplantatsııany úılestirý ortalyǵynyń dırektory Jaqsylyq Dosqalıev tilshilermen kezdesýinde elimiz boıynsha 2016 jyly máıittik donordyń kómegimen 16 adamnyń dene múshesi aýystyrylǵandyǵyn, bıyl 11 adamǵa búırek, baýyr aýystyrý otasy jasalǵanyn aıtty. Al tiri donordyń kómegimen 2016 jyly 248 adamǵa ota jasaldy. Qazirgi kezde 3500-den astam adam donor kútip júr.
