Aqtóbede dárigerler qurmetine «Aıaly alaqan» músini ornatyldy
AQTÓBE. QazAqparat – Aqtóbede medıtsına ortalynyń janyna «Aıaly alaqan» músini ornatyldy. Bul aqtóbelikterdiń aq halattylarǵa aıtqan alǵysy, dep habarlaıdy QazAqparat tilshisi.
«Aıaly alaqan» shaǵyn arhıtektýralyq músininiń avtory ári músinshi Qaıyrbek Tahanov. Ideıany Májilis depýtaty Ǵalymjan Eleýov qoldap, Medıtsına qyzmetkerleri kúni qarsańynda tartý jasady.
Músinniń bıiktigi – 3 metr. Músinshi Qaıyrbek Tahanov ıdeıanyń mán-mańyzyna toqtaldy.
«Pandemııa kezinde dárigerlerimizdiń qadirin túsine bildik. Aq halattylardyń eńbegi zor. Olar kún-tún demeı eńbek etti, naýqastardy dertinen aıyqtyrdy. Ári bul táýelsizdigimizge tartý. Jaqsy úrdisti ózge óńirler de qoldaıdy dep senemiz», - dedi Qaıyrbek Tahanov.
Aıtyp óteıik, oblysta 4 myńnan astam dáriger, 8 myńnan astam orta býyn qyzmetkeri jumys isteıdi.
Oblys turǵyndarynyń densaýlyǵyn nyǵaıtý jáne ómir súrý sapasyn arttyrý maqsatynda biregeı medıtsınalyq kómek kórsetiledi.
Aqtóbe medıtsına ortalyǵy qurylǵan sátten bastap 106 myńnan astam naýqas em aldy.
36 myńnan astam ota jasalsa, onyń 1128-i - joǵary tehnologııalyq medıtsınalyq qyzmet.
