Aqtóbede dári-dármekti zańsyz satqandar ustaldy
AQTÓBE. QazAqparat – Aqtóbe polıtsııasy áleýmettik jelige monıtorıng júrgizip, dári-dármekti zańsyz satqandardy anyqtady, dep habarlaıdy QazAqparat tilshisi.
Memleket basshysynyń tapsyrmasyn oryndaý maqsatynda Aqtóbe oblysynyń polıtsııa departamenti medıtsınalyq preparattardy zańsyz satý faktilerin anyqtaý boıynsha jedel is-shara júrgizdi. Polıtsııa qyzmetkerleri reıd kezinde dári-dármekti ınternet arqyly zańsyz satqandardy anyqtady.
Tekserý kezinde «Tseftrıakson» dárisiniń ár ampýlasyn 1 000 teńgeden satqan adam ustaldy. Al bul antıbıotıktiń ár ampýlasy 150-200 teńge bolýy tıis. Jedel is-shara júrgizý barysynda 27 jastaǵy er adam ustaldy.
«Polıtsııa qyzmetkerleri 31 jáne 26 jastaǵy eki aqtóbelikti bólimshege jetkizdi. Olar áleýmettik jeli arqyly dári-dármek satqan. Er adamnan «Ingaverınniń» 60 ampýlasy, «Tsentrıaksonnyń» 300 ampýlasy men «Deksamezonnyń» 29 ampýlasy tárkilendi. Ekinshisinen «Tseftrıaksonnyń» 3 ampýlasy, «Tsefazalınniń» 50 ampýlasy, «Azıtromıtsınniń» 3 ampýlasy alyndy. Barlyq fakti boıynsha tekserý bastaldy», - dedi oblystyq PD baspasóz qyzmetiniń jetekshisi Erbolat Sarqulov.
