Aqtóbede dárigerdiń qateliginen soń emhana patsıentke moraldyq shyǵyn tóleıdi

AQTÓBE. KAZINFORM – Aqtóbelik Baqytgúl Baetova bosanǵan soń turǵylyqty jeri boıynsha №1 qalalyq emhana baryp, spıral saldyrady. Akýsher-gınekolog sol kezde jatyrdy jartyp jibergen. Sot emhanany 600 myń teńge moraldyq shyǵyn tóleýge mindettedi.

Aqtóbe qalalyq sotynda talap qoıýshy Baqytgúl Baetovanyń aryzy qaraldy. Іs materıalyna súıensek, talap qoıýshy B.Baetova óz turǵylyqty jeri boıynsha emhanaǵa barady. Jas ana akýsher-gınekolog mamanǵa qaralyp, spıral salý usynysyn qabyldaıdy. Qyzmet tegin kórsetilgenimen, aqtóbelik kelinshek ózin birden jaısyz sezinedi. Sol kezde ÝDZ júrgizilip, medıtsınalyq kómek jasaıdy. Alaıda aýyrsyný basylmaı, em júrgizgen akýsher-gınekolog jedel járdem shaqyrady. Oǵan nesep-jynys joldarynyń basqa nemese birneshe bólikterindegi bógde zat dıagnozy qoıyldy, jatyr tesilgen. Jaǵdaıy ortasha aýyr patsıentke eki ota jasalady. Ota barysynda spıral alynǵan jáne jatyrdyń tesigi tigildi. Naýqas shaǵym túsirgen soń tekserý júrip, akýsher-gınekolog, medbıke sógis túrindegi tártiptik jaýapqa tartylady. Budan bólek áıelderge keńes berý bóliminiń akýsheri, jalpy tájirıbedegi dáriger bóliminiń aǵa medbıkesi, taǵy bir medbıke sógis alady. Talap qoıýshy jaýapkerden 1 000 000 teńge moraldyq shyǵyn óndirýdi surady. 

Sot talap aryzdy ishinara qanaǵattandyryp, №1 qalalyq emhanany talap qoıýshy paıdasyna 600 myń teńge moraldyq shyǵyn, 100 myń teńge zańger shyǵynyn óndirýge mindettedi. Sot sheshimi zańdy kúshine engen joq.

Eske salsaq, keshe Aqtóbe garnızonynyń áskerı sotynda eki áskerıge qatysty is qaraldy. ІІM Batys óńirlik áskerı-tergeý basqarmasynyń bastyǵy Muhıt Djavgashev 9 jylǵa, Batys óńirlik áskerı-tergeý basqarmasy tergeý tobynyń aǵa tergeýshisi Ashat Sadýakasov 8 jylǵa bas bostandyǵynan aıyryldy.