Aqtóbede dárigerdi óltirgen meıirger 20 jylǵa bas bostandyǵynan aıyrylýy múmkin
AQTÓBE. KAZINFORM – Marqum Abaı Aısaǵalıevtiń bet-álpetine uqsaıtyn sılıkon maskany tapsyryspen aldyryp, keıin ony paıdalanǵan sottalýshy 20 jylǵa bas bostandyǵynan aıyrylýy múmkin. Búgin prokýror jaryssózde osyndaı jaza taǵaıyndaýdy surady.
Aqtóbe oblystyq qylmystyq ister jónindegi mamandandyrylǵan aýdanaralyq sotynda Qylmystyq kodekstiń «Adam óltirý», «Urlyq» baptary boıynsha is qaraldy. Sot otyrysy bir aıdan astam ýaqytqa sozylyp, búgin jaryssóz ótti.
– Sottalýshy óz sózinde sol kúndi emis-emis biletinin aıtty. Alaıda pyshaq jaraqatyn salǵan soń páter ishinde eden jýdy, jábirlenýshiniń basyna paket kıgizdi. Qan izin jasyrý úshin aıaq-qolyn baılaǵan, muzdatqyshqa salyp, deneni ári-beri tasyǵan. Sot-medıtsınalyq saraptama qorytyndysy boıynsha Aısaǵalıev kóp qan joǵaltqannan, oń jaq keýdesindegi kesip, tesilgen jaraqattan kóz jumǵany jazylǵan. Oń jaq ókpesi men júregi zaqymdanǵan. 7 ret kesip, tesilgen jáne soqqa jaraqatyn alǵan. Sonymen birge Aısaǵalıeviń shotynan 5 268 000 teńge alǵan. Planshetin, telefon jáne ózge de dúnıelerdi qosqanda jalpy shyǵyn – 7 234 860 teńge, - dedi memlekettik aıyptaýshy.
Sot otyrysy kezinde sottalýshynyń tapsyryspen alǵan sılıkon maskasy kórsetildi. Onda maskanyń Abaı Aısaǵalıevtiń bet-álpetine uqsaıtynyn kórýge bolady. Prokýror muny da nazarǵa alýdy surady.
– Qylmystyq kodekstiń 188-baby 3-bóligi 1-tarmaǵy boıynsha 4 jyl 8 aı, 99-baby 2-bóligi 8-tarmaǵy boıynsha 16 jyl, túpkilikti 20 jylǵa bas bostandyǵynan aıyrýdy suraımyz. Jazasyn qaýipsizdigi ortasha túzetý mekemesinde óteıdi, jábirlenýshiniń azamattyq talap aryzyn qanaǵattandyrýdy suraımyz, - dedi memlekettik aıyptaýshy.
Sotqa Alqa bıler qatysty. Úkim erteń oqylady.
Eske salsaq, nefrolog Abaı Aısaǵalıevti 31 jastaǵy meıirger óltirdi degen kúdikke ilikti. Meıirger dárigerdi óltirip, keıin denesin muzdatqyshqa salyp qoıady. Denesin páterden muzdatqyshta saqtaýly kúıinde tasyp, garajǵa, keıin kópqabatty úıdiń jertólesine aparady.
Sot otyrysy kezinde júk kóliginiń júrgizýshileri, júk tıegen adamdar men jábirlenýshilerdiń týystary kýágerlik etti.