Aqtóbede dándi daqyldardyń 60%-dan astamy jınaldy

Aqtóbe oblystyq aýyl sharýashylyǵy basqarmasy bóliminiń basshysy Nurbek Raıymbaevtiń aıtýynsha, bıyl 435 myń gektardan dándi, 84 myń gektardan maıly daqyldar jáne 6 myń gektardan kartop jáne kókónis, baqsha daqyldary jınalady. Búginde 275 myń gektar aýmaqtaǵy dándi daqyldar jınaldy. Bul degenimiz 63%-ǵa teń. Barlyǵy 361 myń tonna astyq bastyryldy. Qazirgi kezde ár gektarynan ortasha eseppen 13,2 tsentner túsip jatyr.

- Astyq saqtaý oryndarynyń jalpy syıymdylyǵy 685 myń tonnany quraıdy. Bul jınalatyn ónimdi tolyq saqtaýǵa múmkindik beredi. Qazirgi ýaqytta elevatorlarda 114 myń tonna astyq saqtaýly. Jalpy syıymdylyqtyń tek 28% júktelgen. Onyń ishinde bıyl jınalǵan astyqtan 90 myń tonna qabyldandy. Egin jınaý jumystaryn júrgizýge qajetti aýyl sharýashylyǵy tehnıkalary men dızel otyny jetkilikti,- dedi Aqtóbe oblystyq aýyl sharýashylyǵy basqarmasy bóliminiń basshysy Nurbek Raıymbaev.

Aıta keteıik, elimizde sharýalar 9,6 mln gektar alqaptan dándi daqyldar jınaǵan, bul jalpy kólemniń 61,6%-yn quraıdy. Búginde ortasha ónimdiligi gektarynan 14,1 tsentner bolatyn 13,5 mln tonna astyq bastyryldy.