Aqtóbede daladan tabylǵan balalar bıikke órmelep shyǵyp alady
AQTÓBE. QazAqparat - Aqtóbe qalasyndaǵy kópirlerdiń birinde tabylǵan balalardyń densaýlyǵynda kinárat joq. Balalar óte belsendi, keıde tereze men shkaf ústine órmelep ketedi, dep habarlaıdy QazAqparat tilshisi.
Aqtóbe qalasynyń Zarechnyı eldi mekenindegi kópir mańynan tabylǵan balalardyń úlkeni eshteńege alańdamaıdy, al kishkentaı qyz anasyn saǵynady. Buǵan deıin habarlaǵanymyzdaı, 1,5 jáne 2 jastaǵy ul men qyz úlkenderdiń qadaǵalaýynsyz dalada júrgen. Ony turǵyndar keziktirip, polıtsııaǵatapsyrdy.
«Balalardyń ata-anasy, týystary habarlaspady. Degenmen olardyń jaǵdaıy, kóńil-kúıleri jaqsy. Olar beıimdelý kezeńinen ótti. Dárigerler tekserdi, densaýlyqtary óte jaqsy degen qorytyndy jasaldy. Topta oınap júr. Úlken ul balalarmen jaqsy aralasty, kishkentaı qyz anasyn saǵynady», - dedi «Úmit» sábıler úıindegi áleýmettik pedagog Janna Tastanova.
Balalarmen psıhologtar da jumys istep jatyr. Mamandar asa belsendi, kez kelgen jerge órmelep shyǵatyn balalarǵa alańdaýly.
«Balalar osy kúnge deıin dalada júrgen sııaqty áser qaldyrady. Olar bıik shkaftyń ústine, terezege órmelep shyǵyp ketedi. Minez-qulyqtary turaqsyz, tez ashýlanyp, tez kúledi. Ekeýin bir-birine kórsetken kezde ózderiniń jaqyn ekenderin biledi», - dedi psıholog Elmıra Danııarova.
Qazirgi kezde daladan tabylǵan balalardyń anasyn izdeý jumystary júrip jatyr. Polıtsııa jasy 20-daǵy Alǵa aýdanynyń turǵynyn áli tappady.
