Aqtóbede dala órti kezinde temirjolǵa qaýip tónip, poıyz toqtatyldy

AQTÓBE. QazAqparat – Aqtóbede dalalyqtaǵy qurǵaq shóp janyp, jalyn temirjoldaǵy aǵash tósenishke ulasty. Nur-Sultan-Oral baǵytyndaǵy poıyz úsh saǵatqa keshikti, dep habarlaıdy QazAqparat tilshisi.

Órt 2 qyrkúıek kúni saǵat 17:35-te tirkelip, oblystyq TJD kezekshi-dıspetcherlik qyzmetiniń pýltine habarlama túsken. Áıteke bı aýdany Jambyl aýyldyq okrýgi Úıtas stansasy aýmaǵynda qurǵaq shóp jandy. Birden temirjolǵa qaýip tóngeni belgili boldy.

Órt sóndirýshiler oqıǵa ornyna saǵat 18:37-de jetip, Úıtas stansasynda bos turǵan úı men saraıdyń janǵanyn kóredi. Sonymen birge, temirjol boıyna jınalǵan shpaldy jalyn sharpyǵan.

«Saǵat 17:20-da Nur-Sultan-Oral baǵytyndaǵy №58 jolaýshylar poıyzy (vagondar sany - 20) toqtatyldy. Keshigý ýaqyty – 3 saǵat 40 mınýt. Saǵat 21:00-de qozǵalys tolyǵymen qalpyna keltirilip, poıyz óz jolyn jalǵastyrdy. Jol boıyndaǵy janyp jatqan shpaldy sóndirýge birneshe ujym jumyldyryldy. «QTJ» AQ-dan 59 adam, 2 órt sóndirý poıyzy jáne tasymaldaýǵa arnalǵan 2 jol súregi bar. Al, qurǵaq shópti sóndirýge TJD qyzmetkerleri bardy», - dep habarlady oblystyq TJD baspasóz qyzmetinen.

Sonymen birge eriktiler, Qarabutaq orman sharýashylyǵy qyzmeti 20-dan astam adam jiberdi. Órt búgin tańda sóndirildi.

Adamdar zardap shekken joq. Órttiń jalpy aýdany – 500 ga.

«QTJ» AQ-nyń derekteri boıynsha temirjol joldaryna zalal kelmegen. Kazir poıyzdardyń qozǵalysy shtattyq rejımde. Jergilikti jerdi «QTJ» qyzmetkerleri qaraýyldaıdy. Tabıǵı órttiń týyndaýyna, olardyń taralýyna jáne eldi mekenderge jaqyndaýyna jol bermeý úshin órt qaýipsizdigin este saqtaý qajet», - dedi oblystyq TJD baspasóz qyzmetinen.