Aqtóbede COVID-19-ǵa qarsy vaktsınany 150 myńnan astam turǵyn qabyldaýy múmkin

AQTÓBE. QazAqparat – Aqtóbede aldymen pedagog, medıtsına qyzmetkerleri men quqyq qorǵaýshylar COVID-19-ǵa qarsy vaktsına qabyldaıdy. Ázirge naqty tizimi jasalmady. Bul týraly óńirlik kommýnıkatsııalar qyzmetinde ótken baspasóz máslıhatynda oblystyq densaýlyq saqtaý basqarmasy basshysynyń orynbasary Bekbolat Іzbasarov aıtty, dep habarlaıdy QazAqparat tilshisi.

Aqtóbe oblysy boıynsha ótken táýlikte 10 adamnan koronavırýs ınfektsııasy anyqtaldy. Onyń basym bóligi Aqtóbe qalasynyń turǵyny.

«Aqtóbe oblysy «jasyl» aımaqta tur. Epıdemıologııalyq ahýal birqalypty. Degenmen arqany keńge salýǵa bolmaıdy. Qańtar, aqpan aılarynda ınfektsııanyń ósýi deńgeıi baıqalýy múmkin. Aldymyzda ınfektsııa kóp tirkelgen maýsym, shilde aılary da kele jatyr», - dedi oblystyq sanıtarlyq-epıdemıologııalyq baqylaý departamenti basshysynyń orynbasary Muhtar Serbaev.

Aıta keteıik, óńirde barlyǵy 3763 jaǵdaı tirkelip, onyń basym bóligi jazyldy. Qazirgi kezde barlyǵy 96 naýqas em qabyldap jatyr. Onyń ishinde 47-i ınfektsııalyq statsıonarda.

«Qazirgi kezde vaktsına qabyldaýǵa nıet bildirýshiler tizimi jasalmady. Sebebi vaktsına áli kelgen joq. Aldymen medıtsına qyzmetkeri, pedagogtar men quqyq qorǵaýshylar qabyldaıdy. Bári erikti túrde júrgiziledi. Shamamen oblys boıynsha 150 myń adamǵa ekpe jasaýdy josparlap otyrmyz», - dedi oblystyq densaýlyq saqtaý basqarmasy basshysynyń orynbasary Bekbolat Іzbasarov.