Aqtóbede bıýdjetten 272 mln teńge jymqyrǵandar sottaldy

AQTÓBE. KAZINFORM – Aqtóbede bıýdjetten 272 mln teńge jymqyrǵandar sottaldy.  

Aktóbe qalasynyń №2 sotynda bıýdjet qarajatyn asa iri mólsherde jymqyrý faktisi boıynsha qylmystyq is qaraldy.

Bas prokýratýranyń málimetinshe, osyǵan deıin Aktóbe qalasynyń prokýratýrasy bıýdjet qarajatyn paıdalanýdyń tıimdiligine júrgizilgen tekseris nátıjeleri boıynsha sotqa deıingi tergeýdi bastady.

Tergeý barysynda Aktóbe qalasynyń Jol qozǵalysy qaýipsizdigin qamtamasyz etý jáne tsıfrlyq tehnologııalar ortalyǵynyń dırektory jeke kásipkermen aldyn ala sóz baılasyp, memlekettik satyp alý aıasynda jol tańbalaryn salý boıynsha 272 mln teńgeden astam somaǵa jalǵan kelisimshart jasaǵany anyqtaldy.

Alaıda is júzinde jumystar oryndalmaǵan, al urlanǵan qarajat qolma-qol aqshaǵa aınaldyrylyp, ıemdenilgen. Nátıjesinde memleketke asa iri mólsherde zalal keltirilgen.

Osy fakti boıynsha QK 189-babynyń 4-bóligi 2) tarmaǵy (senip tapsyrylǵan múlikti qyzmettik jaǵdaıyn paıdalana otyryp, aldyn ala sóz baılasý arqyly adamdar toby bolyp asa iri mólsherde ıemdený nemese talan-tarajǵa salý) boıynsha sotqa deıingi tergeý bastaldy.

Іs sotqa joldandy. Sot usynylǵan dáleldemelerdi qarap, memlekettik aıyptaýshynyń ustanymyn eskere otyryp, sottalǵan tapsyrys berýshini memlekettik qyzmette laýazym atqarý quqyǵynan ómir boıyna aıyra otyryp, 8 jylǵa bas bostandyǵynan aıyrý jazasyn taǵaıyndady.

Al merdigerge kásipkerlik qyzmetpen aınalysý quqyǵynan 10 jylǵa aıyra otyryp, 7 jylǵa bas bostandyǵynan aıyrý jazasyn taǵaıyndady.

Úkim zańdy kúshine engen joq.

Buǵan deıin atyraýlyq áıel onlaın-bankıng arqyly 80 mln teńgege jýyq qarjyny jymqyrǵanyn jazǵan edik.