Aqtóbede bıýdjetke 1 mlrd teńgeden astam qarajat qaıtaryldy
AQTÓBE. KAZINFORM — 2025 jyly Aqtóbe oblysynyń prokýratýrasy memleket kirisine 1 mlrd teńgeden astam qarajat óndirdi.
Qarajat memlekettik kelisimsharttar boıynsha kepildik mindettemelerdi oryndaý, memlekettik satyp alý sharttary boıynsha qamtamasyz etý jáne turaqsyzdyq aıyby, sondaı-aq salyq bereshegin óteý esebinen qaıtaryldy.
Mysaly, oblystyq qurylys basqarmasy men «MIR-A Construction» JShS arasynda Baıǵanın aýdanynyń Mataı aýylynda modýldik úlgidegi ǵımarattardan turatyn oqý-jattyǵý bazasyn salý týraly kelisimshart jasalǵan.
– Shartty oryndaý aıasynda merdigerge 288 mln teńge kóleminde avanstyq tólem aýdarylǵan. Keıin shart birjaqty tártippen buzylǵanymen, avans somasy bir jyldan astam ýaqyt boıy qaıtarylmaǵan. Prokýrorlyq qadaǵalaý sharalarynyń nátıjesinde kórsetilgen qarajat óndirilip, memleket kirisine qaıtaryldy. Atalǵan baǵyttaǵy jumys jalǵasýda jáne prokýratýra organdarynyń turaqty baqylaýynda, - delingen oblystyq prokýratýra habarlamasynda.
Buǵan deıin 2 mln ga paıdalanylmaǵan jer merziminen buryn memleket menshigine qaıtarylǵanyn jazǵan edik.
Almatyda quny 5,9 mlrd teńge jer memleket menshigine qaıtaryldy.