Aqtóbede bıýdjet túsimi artty
AQTÓBE. QazAqparat - Bıyl qańtar-aqpan aılarynda oblys bıýdjetine 21,1 mıllıard teńge tústi. Bul ótken jyldyń sáıkes kezeńimen salysyrǵanda 10 paıyzǵa kóp, dep habarlaıdy QazAqparat tilshisi.
Aqtóbe oblysy ákimdiginde bıýdjet túsimi, shaǵyn jáne orta bıznesti damytý tapsyrmasy qaraldy. Oblys ákimi Berdibek Saparbaev atqarýshy organdarǵa, Aqtóbe qalasy jáne aýdan ákimderine josparlanǵan kórsetkishterge jetý úshin tolyq sharalar qabyldaýdy tapsyrdy.
«Josparlanǵan maqsattarǵa qol jetkizý úshin qolda bar qorlardy barynsha paıdalaný qajet. Memleket basshysynyń tapsyrmasy aıasynda biz 2018 jyly 5% ekonomıkalyq ósimge qol jetkizý boıynsha mindettemeler qabyldadyq. Bul úshin oblystyń áleýmettik-ekonomıkalyq damý qarqynyn jyl basynan báseńdetpeý kerek», - dedi oblys ákimi Berdibek Saparbaev.
Qazirgi ýaqytta óndiristiń damý dınamıkasy saqtaldy. Aqtóbe oblystyq ekonomıka jáne bıýdjettik josparlaý basqarmasy basshysynyń orynbasary A.Qaıyrmekovtiń aıtýynsha, jyl basynan beri óndiristiń ósýi 251,2 mıllıard teńgeni qurady. Óńirde munaı, gaz, ferroqorytpa óndirisi artty. Sonymen qatar, 82,7 myń sharshy metr turǵyn úı paıdalanýǵa berildi. Oblystyń barlyq aýdandary men Aqtóbe qalasynda aýyl sharýashylyǵy óndirisi 15,7 mıllıard teńge boldy.
Aqtóbe oblysy ákiminiń baspasóz qyzmetiniń habarlaýynsha, Oıyl, Muǵaljar, Shalqar jáne Alǵa aýdandary ınvestıtsııa tartýda artta keledi. «Bıznestiń jol kartasy -2020» baǵdarlamasy boıynsha 16 joba ǵana iske asyrylǵan. Bul kórseshkish tómen. Óńir basshysy Berdibek Saparbaev jıyn kezinde azyq-túlik, dári-dármek baǵalaryn turaqtandyrýdy, ınflıatsııany jáne jumyssyzdyqty tómendetýdi tapsyrdy.
