Aqtóbede bıýdjet qarjysyn ıgere almaı otyrǵan basqarmalar belgili boldy
Aqtóbe oblysynyń ákimi Berdibek Saparbaev bıýdjet qarjysyn ýaqytyly ıgerýdi tapsyrdy. Al eger Aqtóbe qalasy men aýdan ákimderi, basqarma basshylary memlekettik baǵdarlamalar aıasynda bólingen qarjyny tolyq ıgere almasa, jaýapkershilikke tartylady. Eskertý bergen óńir basshysy Berdibek Saparbaev apta saıyn baqylaý júrgiziletinin aıtty.
«Apta saıyn baqylaý júrgizý kerek. Aqtóbe oblystyq qurylys, sáýlet jáne qala qurylysy, aýyl sharýashylyǵy basqarmalary men Іshki ister departamenti bólingen qarjyny tolyq ıgere almaı otyr. Jyl sońyna deıin bólingen qarjy bári ıgerilýi tıis. Bul baǵyttaǵy jumysty únemi baqylaýda ustaımyz», - dedi óńir basshysy Berdibek Saparbaev. Sonymen qatar, bilim berý, kásipkerlik, densaýlyq saqtaý basqarmalary da jumysty tııanaqty atqara almaı otyr.
Aqtóbe oblysy ákiminiń orynbasary Asqar Bıahmetovtiń aıtýynsha, bıyl oblystyq bıýdjettiń shyǵys bóligi 223 mıllıard teńgeni quraǵan. Qazirgi kúni qarjynyń 88,3% paıyzy ıgerildi. Naqtylasaq, aýdandyq bıýdjet 88,5 paıyzǵa júzege asyryldy. Jyl sońyna deıin áli de 55 mıllıard teńge jumsalyp, maqsatty ıgerilýi tıis. Ásirese, respýblıkalyq transferttiń 15 mıllıard teńgesi de maqsaty boıynsha jumsalýy kerek. Aqtóbe oblysy ákiminiń baspasóz qyzmetiniń habarlaýynsha, Ulttyq qordan áleýmettik ınfraqurylym men bilim berýdi damytý jobalaryna dep bólingen qarjy baıaý ıgerilip jatyr.
