Aqtóbede buzaý izdeýge shyǵyp, sýǵa batyp ketken ekinshi balanyń denesi tabyldy

AQTÓBE. QazAqparat - Keshe Yrǵyz aýdanynyń Qurylys aýylynda eki bala sýǵa batyp ketip, biriniń denesi eki saǵat ishinde tabyldy. Al ekinshisin súńgýirler 5 metr tereńdikten alyp shyqty, dep habarlaıdy QazAqparat tilshisi.

«28 mamyr kúni saǵat 01:25-te TJD Jedel qutqarý jasaǵynyń súńgýirleri tereńdigi 5 metr jáne jaǵadan 6 metr qashyqtyqta 12 jastaǵy er balanyń denesin sýdan shyǵardy»,- dep habarlady oblystyq TJD baspasóz qyzmeti.

Eske salsaq, oqıǵa Yrǵyz ózeniniń Qurylys aýyly mańynda boldy. 12 jastaǵy eki bala buzaý izdeýge shyǵyp, oralmaǵan. Olardyń janynda bolǵan 13 jastaǵy bala biriniń sýǵa qulaǵanyn, al ekinshisin kórmegenin aıtqan. Arada eki saǵat ótkende jergilikti turǵyn bir balanyń denesin shyǵardy. Al ekinshisin tabý qıynǵa soqty. Olar - Báımen Almanov atyndaǵy orta mekteptiń 6-synyp oqýshylary.

Aıta keteıik, byltyr dál osy Yrǵyz aýdanynda úsh bala sýǵa batyp ketken bolatyn. Aqshı aýylynda 2017 jáne 2018 jyldary týǵan úsh bala úlkenderdiń nazarynan tys qalǵan. 4 jáne 5 jastaǵy qyz bala bir otbasynan bolsa, 4 jasar ul ekinshi otbasynyń balasy.

Byltyr shomylý maýsymynda 19 adam sýǵa batyp ketti. Onyń 9-y bala. Bıyl oblysta 64 oryn belgilendi. Qazirgi kezde TJD qyzmetkerleri sý astyn tekserip jatyr. Shomylý maýsymy 1 maýsym kúni ashylady.