Aqtóbede bútin bir shaǵyn aýdan turǵyndary qysta tońyp otyr
AQTÓBE. KAZINFORM – Aqtóbe qalasyndaǵy Eset batyr shaǵyn aýdanynda kópqabatty turǵyn úıler qystyń aıazdy kúninde tońyp otyr. Munda kóbine memlekettik, bıýdjettik mekeme qyzmetkerleri, turǵyn úı kezegimen páter alǵandar qonystanǵan.
Shaǵyn aýdanda óz jylytý qazandyǵy da bar. Alaıda turǵyndar qysta tońyp, keıde túneı almaı, týys jaǵalap ketedi.
- Eset batyr turǵyn alabyndaǵy 1-shaǵyn aýdanynda turamyn. Bıyl jylytý maýsymynda kóp shaǵym boldy. Alaıda men turatyn úıdiń jylý júıesi 2021 jyldan beri durys emes. Úıimiz salqyn, ómir súrý múmkin emes. Kóp shaǵym túsirdim, E-ótinish arqyly da aryz jazdym. Mamandar kelip, «bári jaqsy» dep aıtyp ketedi. Súzgini de aýystyrdym, eshteńe ózgermedi,- dedi turǵyndardyń biri Dınara Ermýrzına.
Al Gúldana Ersaıynova bolsa tórt balasymen birge as bólmesinde ǵana uıyqtaıdy. Ózge bólmeniń bári sýyq, yzǵar.
- Eki bólme bolǵanyn qaıteıin, as bólmede tamaq iship, sonda uıyqtaımyz. Úı salqyn. Osy jyly tipti salqyndap ketti. Biz qyzmet kórsetýshi «Adal qyzmet Aqtóbe» kompanııasyna, tipti ákimdikke bardyq. Ákimdik «bizdiń jylýǵa qatysymyz joq» dep shyǵaryp saldy. Turǵyn úı - kommýnaldyq sharýashylyq bólimine nemese «Aqtobe su-energy group» kompanııasyna qaraı siltep jiberdi. Bári osylaı shyǵaryp salady. Qys boıy as bólmege gaz jaǵyp, uıyqtar kezde óshiremin. Tańda as bólmeden shyqsaq muzdatqyshqa kirip bara jatqandaı bolamyz. 11 jyldan beri turyp jatyrmyn. Sońǵy eki jyldaǵy jaǵdaı osy,- dedi Gúldana Ersaıynova.
- Páterimiz úıdiń buryshynda ornalasqan soń bir bólmede eki batareıa bar. Batareıa qanjylym bolyp turady. Sondyqtan terezeni, balkon esigin túgel qymtap qoıamyz. Jylý ustaý úshin kilemniń astyna deıin qurylys materıalyn tóseımiz,- dedi turǵyn Orynbıke Ýbaıdýllına.
Eset batyr turǵyn alabyndaǵy 78 kópqabatty úıge «Adal qyzmet Aqtóbe» kompanııasy qyzmet kórsetedi. Turǵyndar shaǵymynan soń arnaıy komıssııa qurylyp, tekserý júrgizildi. Keıbir páter ishi shyn máninde salqyn ekeni anyqtaldy.
- Ótken aptadan bastap turǵyndardan shaǵym tústi. Ortaq chat ashylǵannan keıin biz jedel túrde komıssııa qurdyq. Aqtóbe qalasy turǵyn úı ınspektsııasyna, «Aqtobe su-energy grour» kompanııasynyń basshysyna habarlastym. Páterlerdi aralaý barysynda kóbinde salqyn boldy. Turǵyndarǵa eskertip, úılerdiń jertólesin tolyq tekserdik. «Aqtobe su-energy group» kompanııasy mamandarymen birigip ótken aptada magıstraldy jylý qubyrynda retteý júrgizildi. Búgingi tańda qalypty temperatýra ustap otyr,- dedi «Adal qyzmet Aqtóbe» kompanııasynyń basshysy Dáýlet Nurlanov.
Al jylý berýshi «Aqtobe su-energy grour» kompanııasy eshqandaı da irkilis bolmaǵanyn, jylý qalypty rejımde berilgenin jetkizdi.
- Qazirgi tańda Eset batyr aýdanyna jylý qalypty jaǵdaıda berilip jatyr. Barlyǵy normatıvke saı. Túsken shaǵym boıynsha turǵyn úı ınspektsııasy, qyzmet kórsetýshi kompanııamen birge bardyq. Bizdiń tarapymyzdan eshqandaı shekteý joq. Keıbir páter ıeleri balkon esigin durys bekitpegen, terezeden jel soǵady. Birinshi qabatta turatyndar edendi de bekitý kerek. Jylý qazandyǵy jańa. Tórt qazandyq jumys istep tur. Ekeýi rezervte,- dedi Aqtobe su-energy grour kompanııasynyń jylý jelileri jónindegi orynbasary Janbolat Sarmanov.
Aıta keteıik, qańtar aıynda Aqtóbe qalasy Á.Moldaǵulova dańǵyly boıynda jylý qubyry jaryldy. Munda jóndeý jumystary 5 saǵatqa sozyldy.