Aqtóbede bútin bir aýyl turǵyndary gaz beriledi dep jylýsyz qaldy
AQTÓBE. KAZINFORM — Muǵaljar aýdany Qojasaı aýylyna gaz qubyry tartylyp, bıyl qosylýy tıis edi. Alaıda úıdegi peshin buzyp, kógildir otynǵa qosylýǵa daıyndalǵan turǵyndar kúzdiń sýyǵynda tońyp otyr.
Muǵaljar aýdany Qojasaı aýylynyń turǵyndary qarashanyń sýyǵynda tońyp otyrǵanyn aıtyp, kómek surady.
— Aýylymyzǵa gaz qubyry tartylyp, tehnıkalyq jumystardyń aıaqtalǵanyna qaramastan áli kúnge deıin iske qosylmady. Aýyl turǵyndary úshin qys qıyn ótedi. Otyn men kómir baǵasy qart adamdar men kópbalaly otbasylarǵa aýyr salmaq túsiredi. Gaz júıesi tartylyp, naýryz aıynda qosylady degen. Biraq qarasha aıy boldy, áli sheshimin tappady. Bizge naqty qaı ýaqytta qosylatyny týraly aqparat kerek, — dep aıtty turǵyndar.
Qojasaı aýylynda 50 úıde 200-den astam adam turady. Gaz berý jeltoqsan aıyna josparlanǵan.
— «QazaqGaz Aimaq» AQ oblystyq fılıalynyń qoldanystaǵy ınvestıtsııalyq baǵdarlamasy aıasynda Aqtóbe oblysy Muǵaljar aýdanynyń Qojasaı aýylyn gazdandyrý jumystary bastaldy. Búgingi tańda qurylys-montaj jumystary tolyq aıaqtalyp, avtomattandyrylǵan gaz taratý stantsııasyn iske qosýǵa daıyndyq jáne retteý jumystary júrgizilip jatyr. Bıyl 1 jeltoqsanda jumystardy tolyq aıaqtap, gaz berý josparlanyp otyr, — dep habarlady Aqtóbe oblysynyń energetıka jáne turǵyn úı-kommýnaldyq sharýashylyǵy basqarmasy.
Muǵaljar aýdanynyń ákimi Darhan Ermaǵambetovtiń aıtýynsha, joba quny — 1,8 mlrd teńge.
— Injenerlik-tehnıkalyq qujaty jasalyp jatyr. Qujatyn tapsyryp, qosady. Gaz qubyry synaqtan ótti. «QazaqGaz Aimaq» AQ-nyń aýdandyq fılıaly úılerdiń qujattaryn rettep, ázirlep qoıdy. Tek gazdyń qubyrǵa berilýin kútip otyrmyz. Bıyl úılerge, keler jyly áleýmettik nysandarǵa beriledi. Turǵyndarǵa buǵan deıin de peshti buzýǵa bolmaıdy dep eskerttik. Tek gaz qosylǵanda jóndeýge keńes berdik. Tapsyrys berýshi de, ony iske asyrýshy da — «Intergaz» AQ. Óziniń ınvestıtsııalyq jobasy aıasynda qubyr tartty, — dedi Darhan Ermaǵambetov.
Aıta keteıik, Aqtóbeden Qostanaıǵa jańa gaz magıstraly tartylýy múmkin. «QazaqGaz» ulttyq kompanııasy» aktsıonerlik qoǵamynyń basqarma tóraǵasy Álibek Jamaýov Qashaǵan ken ornynda gaz óńdeý zaýytyn salý jobasy qandaı satyda ekenin aıtty.