Aqtóbede bútin bir aýdan ortalyǵynyń halqy sýdy belgili bir saǵatta ǵana tutyna alady

AQTÓBE. KAZINFORM — Yrǵyz aýdanynyń ortalyǵynda aýyz sý belgili bir ýaqytta ǵana beriledi. Aýyz sýmen qamtý máselesin sheshý úshin qarjy qajet.

Aqtóbe oblysynyń eń shalǵaı aýdany Yrǵyzda jaz aılarynda sý tapshylyǵy anyq seziledi. Aýdandaǵy Jambyl, T.Júrgenov, L.Shaqparov kósheleriniń turǵyndary jıi shaǵym aıtyp, tipti birneshe kún boıy kútip júrgenin jazdy. Aýdanda sý shynymen de tapshy. Sý aıdaý stansasyn jańǵyrtý kerek, al oǵan qarjy tapshy.

— Aýdan ortalyǵy Yrǵyz aýylynda 2 sý munarasy bar. Sol arqyly sý 3 mezgil beriledi. Aýyz sý munaralarynyń kólemi az bolǵan soń aýdan ortalyǵynyń keı kósheleriniń turǵyn úılerine sý jetpeıdi. Sol úshin syıymdylyǵy 160 tekshe metr bolatyn 2 sý munarasyn salý josparlandy. Aldaǵy ýaqytta medıatıvtik kelisim negizinde iske asyrý máselesi qarastyrylady. Budan bólek 1975 jyldary salynǵan «Aıyrqyzyl-Yrǵyz» sý aıdaý stansasyn rekonstrýktsııalaý boıynsha joba jasaqtaldy. Jobanyń jalpy quny — 892,1 mln teńge. Joba aıasynda 7 uńǵyma qaıta burǵylanyp, aryndy sý qubyry rekonstrýktsııalanady. «Aıyrqyzyl-Yrǵyz» boıynsha qarjy bólýge bıýdjettik ótinim usynyldy. Qarajat bólingen jaǵdaıda joba iske asyrylady, — Aqtóbe oblysy ákiminiń baspasóz qyzmeti.

Aıta keteıik, Aqtóbe qalasy men aýyldarda sýdy tasyp iship otyrǵan adamdar bar. Tipti kórshi aýylǵa barady.