Aqtóbede burshaq jaýady: Ákim turǵyndardy saq bolýǵa shaqyrdy
AQTÓBE. KAZINFORM — Aqtóbe qalasynda eki kún boıy jańbyr jaýyp, 95 assenızator jumys istedi. Qala ákimi Azamat Beket burshaq, jańbyr jaýatynyn eskertip, saq bolýǵa shaqyrdy.
Aqtóbe oblystyq TJD-niń baspasóz qyzmeti 10 tamyz kúni qalada jańbyr, burshaq jaýyp, jel kúsheıetinin habarlady.
Oblystyń batysynda, soltústiginde, ortalyǵynda jáne qalada naızaǵaı oınaıdy.
Qala ákimi Azamat Beket senbi kúni kóshege shyqpaýǵa keńes berdi.
— Qazgıdromettiń málimetine sáıkes, kesheden beri túsken jaýyn-shashyn mólsheri 74 mm boldy. Bul degenimiz normadan 4 ese artyq. Ótken túnde barlyǵy 95 assenızator shyqty. Qazirdiń ózinde 10 motopompa, 5 nasos stansasy jumys istep tur. Shyǵarylǵan sýdyń kólemi — 30 myń tekshe metr. Tótenshe jaǵdaılar qyzmeti eskertý jarııalady. Tań aldynda daýyl, nóser jaýyn, burshaq jaýady dep boljandy. Elimizdiń keıbir óńirlerinde kesheden beri burshaq jaýyp, avtokólikterdiń búlingeni belgili. Sondyqtan múlikterińizge abaı bolyńyzdar. Aýa raıynyń qolaısyz ekenin eskerýlerińizdi, qajettilik bolmasa kóshede beımezgil júrmeýdi suraımyz. Sınoptıkterdiń boljamy boıynsha, Aqtóbe aýmaǵynda osyndaı aýa raıy aldaǵy kúnderde de saqtalady. Qatty jaýyn bolǵan jaǵdaıda sýdy shyǵarý jumystary jalǵasady, — dedi Aqtóbe qalasynyń ákimi Azamat Beket.
Aıta keteıik, Aqtóbe qalasynda aǵaıyndy Jubanovtar kóshesindegi jol opyrylyp tústi.
Al kópqabatty úıde káriz sýy keri aqty.
