Burynǵy áıelin qylǵyndyryp óltirgen aqtóbelik azamat 11 jylǵa sottaldy
AQTÓBE. KAZINFORM – Aqtóbe oblystyq qylmystyq ister jónindegi mamandandyrylǵan aýdanaralyq sotynda Nurjan Haırýllaevqa úkim shyqty. Ol burynǵy áıelin qylǵyndyryp óltirip, oqıǵa ornynan boı tasalaǵan.
Qylmystyq oqıǵa bıyl 31 qańtardan 1 aqpanǵa qaraǵan túni boldy. Іs materıalyna súıensek, sottalýshy ajyrasqan soń bala-shaǵasymen Aqtóbe oblysy Temir aýdany Shubarshı aýylynda turatyn burynǵy áıeline barǵan. Ony urys kezinde qylǵyndyryp óltirip tastaǵan.
Búgin Aqtóbe oblystyq qylmystyq ister jónindegi mamandandyrylǵan aýdanaralyq sotynda úkim oqyldy.
– Nurjan Haırýllaev Qylmystyq kodekstiń 99-baby 1-bóligimen kináli dep tanylyp, oǵan 11 jylǵa bas bostandyǵynan aıyrý jazasy taǵaıyndalsyn. Jazasyn qylmystyq atqarý júıesiniń ortasha qaýipsiz mekemesinde óteý belgilensin. Jábirlenýshiniń talap aryzy ishinara qanaǵattandyrylsyn. Haırýllaevtan Saǵymbaevanyń paıdasyna 318 062 teńge materıaldyq shyǵyn, zańgerdiń kómegine 500 myń teńge óndirilsin. Haırýllaevtan Saǵymbaevanyń paıdasyna 20 mln teńge moraldyq zııan óndirilsin, - dedi sýdıa Altynbek Sabyrov.
Aıta keteıik, sot úkimimen jábirlenýshi tarap kelispedi. Olar apellıatsııalyq shaǵym túsirmek.
– 11 jyldy az dep esepteımiz. Sińlim Aıbaný bar bolǵany 26 jasta, órimdeı qyz edi. Artynda eki qyz, bir uly qaldy. Ári qaraı aryzdanamyz. Ákelik quqyǵynan aıyrýǵa aryz túsiremiz. Balalaryn ómir boıy kórmesin. Qazir 6, 5, 3 jastaǵy balalary meniń qolymda. Túnimen jylap shyǵady, izdeıdi. «Mamam qaıda, nege kelmeı jatyr» dep jylaıdy. Keshe ekinshi qyzynyń týǵan kúni boldy. Týǵan kúnine keledi dep kútip júrgen. «Nege kelmedi» dep jylaıdy. «Aspannan qarap tur mamań» deımiz. «Nege kórinbeıdi» dep aıtady. Keledi dep te, kelmeıdi dep te aıta almaımyz. Balalardyń jaǵdaıy óte qıyn, - dedi Sáýle Saǵymbaev.
