Aqtóbede búlingen joldardy jóndeý jumystary bastaldy
AQTÓBE. KAZINFORM – Aqtóbede byltyr salynǵan joldardan aqaý shyǵyp jatyr. Aqtóbe qalasynda joldaǵy oı-shuńqyrdy jamaýǵa 250 mln teńge bólindi. Bul jumys bir merdigerge júkteldi.
Kúzde qubyr salyp, kóktemde kólikter batpaqqa batyp qaldy
Aqtóbe qalasyndaǵy Ońtústik batys turǵyn alabynyń Aqtan batyr kóshesine jartylaı jóndeý jumystary júrgizilgen. Bul kósheniń bir bóligine asfalt salynyp, ekinshi bóligi batpaq bolyp jatyr. Qubyr júrgizilgen aýmaqta kólik balshyqqa batyp qalǵan, birneshe kúnnen beri qoqys jınalmady. Sebebi munda qoqys tasymaldaıtyn kólik kire almaı qaldy. Aqtan batyr kóshesine qıylysatyn Isataı Taımanov kóshesinde de dál osy kórinis. Bul kóshe de jartylaı jóndelip, byltyr qurylys jumystary aıaqtalmaı qaldy.
- 2024 jyldyń sońynda kósheniń bir bóligine asfalt tósedi. Biz barlyǵyn da asfalttaıdy dep oıladyq. Biraq joldy ýaqytsha japqanymen, asfalt sol kúıi tóselmedi. Qysta joldyń qaryn ashyp, qyryp turdy. Al kóktemde jertólege sý ketti. Qaıta-qaıta kómek suraǵan soń sýdyń ústine qum tósep ketti. Kún saıyn ákimdikke habarlasyp otyramyn. Sol kezde kelip, sýdy soryp ketedi. Bizge nátıje kerek. Balalarymyzdy balabaqshaǵa apara almaımyz, al taksı qyzmeti qymbattap ketti. Tipti 100 metr jerge 1000 teńge suraıdy. Al ózimiz dárigerge barý úshin jar jaǵalap júrmiz. Taımanov kóshesi turǵyndarynyń tilegi sol,- dedi Aqtóbe qalasy Taımanov kóshesiniń turǵyny.
Al Jańaqonys-3 turǵyn alabyndaǵy Sulýtór kóshesinde asfalt búlindi. Turǵyndar byltyr ǵana joldyń birneshe qabaty tóselgenin, al bıyl kóktemde qıyrshyq tastary úgitilip jatqany týraly aıtyp, áleýmettik jelige jarııalady.
- Byltyr Sulýkól kóshesinde nyǵyzdyq koeffıtsıenti talapqa saı kelmedi. Birinshi qabaty osylaı shashylyp qalyp jatyr. Endi qyryp, qaıta salýy kerek. Merdiger sapasyz salǵan. Syn aıtqanda byltyr bári kúmánmen qarap edi. «Kóktemde kelgende kóresińder» dep edim. Mine, jol osylaı bolyp tur,- dedi «Jol aktıvteriniń ulttyq sapa ortalyǵy» Aqtóbe oblystyq fılıalynyń dırektory Telman Malaev.
Jol sapasynan kemshilik anyqtalǵanymen, merdiger bárine birdeı qulaq asa bermeıdi
«Jol aktıvteriniń ulttyq sapa ortalyǵy» Aqtóbe oblystyq fılıalynyń dırektory Telman Malaevtiń aıtýynsha, byltyr Aqtóbede 175 jobaǵa tekserý júrgizildi. Kóbi aýdandyq mańyzy bar jol.
- Jol qurylysy sapasyn tekserý kezinde 400-ge jýyq kemshilik anyqtaldy. Máselen jol salý kezinde úsh tehnıka júrýi tıis bolsa, onyń bireýi, keıde ekeýi ǵana bolady. Sonymen birge tasymaldaǵan kezde asfalt qospasynyń temperatýrasy saqtalmaıdy. Bul da sapaǵa áser etedi. Qospany tóser kezde qıyrshyq tastyń ústine bıtým jaǵýy tıis. Ol da bolmaı qaldy keıbir jobada. Tehnıkalyq qadaǵalaýshylardy da tappaı qalamyz. Munyń dári kemshilik. Sonyń teń jartysyna jýyǵy kemshilikti túzemedi.
Tehnıkalyq qadaǵalaýshy, jol sapasyna jaýapty tikeleı adam. Biraq olardyń jumysyn biz kórmeımiz, merdigerlerge de sol qolaıly bolyp tur. Byltyr jol qurylysyna paıdalanylatyn materıaldardyń da sapasyn tekserip, 2 myń synama alyndy. Sol kezde 30 paıyzǵa jýyǵy talapqa saı bolmaı shyqty. Ol qatelikti eskerdi me, álde sol kúıi qaldyrdy ma? Bizge bul jaǵy beımálim. Sebebi tapsyrys berýshi de, merdiger de keri jaýap qatpady. Soǵan qaraǵanda sol sapasyz materıaldar qurylys, jóndeý kezinde paıdalanylǵan bolýy múmkin. Biz oǵan senimdimiz,- dedi «Jol aktıvteriniń ulttyq sapa ortalyǵy» Aqtóbe oblystyq fılıalynyń dırektory Telman Malaev.
Máselen byltyr Keńes Nokın dańǵyly salynǵan kezde jol-qurylys materıaldary jobalyq-tehnıkalyq talapqa saı bolmady. Talap boıynsha iri dándi tyǵyz asfalt-beton qospasy paıdalanylýy tıis edi. Alaıda jol jóndeý kezinde usaq kesekti materıal paıdalanylǵan.
- Biz zerthanalyq taldaý jasaǵan soń eskertý berdik. Bul joldy jartylaı salǵan kezde qaıta eskertý jasaǵan edik. Tapsyrys berýshi birinshi eskertýde shuǵyl toqtatyp, qaıta saldyrýy kerek qoı. Olaı etpedi, al bıyl joldan aqaý shyqty. Dál osy ýchaskede tyǵyzdyǵy da tekserildi. 12 synama sáıkes kelmeı, «qaıta jasaý» týraly usynys jasaǵanbyz. Bıyl jol nashar, kólikti dirildetip jiberedi, - dedi Telman Malaev.
Qalada jol jamaý jumystary bastaldy
Qar erigen soń joldyń oı-shuńqyry kórinip jatyr. Aqtóbe qalasy ákimdigi aǵymdaǵy jóndeýdi bastaǵan.
- Aqtóbede qystan keıin joldardyń asfalt jabyndysynda paıda bolǵan aqaýlardy joıý úshin aǵymdaǵy jóndeý jumystary bastaldy. Jumys qalanyń ortalyq kóshelerinen bastap, júrgizilip jatyr. Merdiger oıyq paıda bolǵan jerdi kesip alyp, asfalt tóseıdi. Mundaı jumystar qalanyń ortalyǵyndaǵy Máskeý, Qurmysh, Sút zaýyty, Shanhaı aýdandaryndaǵy, eski qaladaǵy jáne turǵyn alaptardaǵy kóshelerde júrgiziledi. Aǵymdaǵy jóndeý jumysymen aınalysyp jatqan merdiger uıym - «Kokvest» JShS.
Kelisimshart somasy boıynsha 250 mln teńge qarastyryldy. Biraq bul qarajat merdigerge tolyq tólenedi degen sóz emes. Sebebi qarjy merdigerge jumysty aıaqtaǵannan keıin aýdarylady. ıAǵnı, qansha sharshy metrde aǵymdaǵy jóndeý jasalǵany esepteledi. Sodan keıin esebine qaraı kelisimshart somasy azaıtylýy múmkin. Jumystar osy jáne aldaǵy aıda júredi,- dep habarlady Aqtóbe qalasy ákiminiń baspasóz hatshysy Aıgúl Baımenova.
«Jol aktıvteriniń ulttyq sapa ortalyǵy» Aqtóbe oblystyq fılıalynyń dırektory Telman Malaevtiń aıtýynsha, ár kóktem saıyn oı-shuńqyrdy biteý durys. Eger kishkentaı oıyq bolsa, der kezinde jóndep, joldyń ári 2-3 jyl qyzmet kórsetýine múmkindik beredi. Al eger sol kúıi jóndelmese, oıyq kólemi úlkeıip, jol jaramsyz kúıge túsedi.
Aıta keteıik, Aqtóbe oblysynda jol qurylysy jumysy mamyr aıynda bastalady. Oblystyq jolaýshylar kóligi jáne avtomobıl joldary basqarmasynyń basshysy Aıbek Qaıyrdyń aıtýynsha, 101 jobany júzege asyrýǵa 44,7 mlrd teńge bólingen. Olardyń ishinde 21-i – jergilikti, qalǵan 80-i – qalaaralyq jáne aýylishilik joldar.