Aqtóbede búgin 58 avtobýstyń júrgizýshisi jumysqa shyqpaı qaldy
Aqtóbe qalasyndaǵy tasymaldaý jumysyn tórt mekeme qamtamasyz etedi.
Keshe keshkilik «Avtopark» JShS-niń bir top júrgizýshisi aınalymdy tolyq aıaqtamaı, orta joldan qyzmetin toqtatty.
Kelissóz júrgizilgenimen, júrgizýshilermen bir mámilege kelý múmkin bolmaı tur. Búgin 58 qoǵamdyq kólik avtobýstar parkinen shyqpaǵan.
«Avtopark» JShS qyzmet kórsetetin №21-baǵyttyń ornyna búgin №51-baǵyttyń avtobýstary júrip jatyr. Onyń syzbasy uzartyldy. Sonymen qatar №26-baǵyttyń jumysyna qatysty qazir retteý jumystary júrip jatyr. Ázirge turǵyndarǵa №24, 15, 8, 48-baǵyttardyń avtobýstaryn paıdalaný usynyldy. Qalǵan baǵyttardyń bári de avtobýstarmen qamtyldy. Uıaly telefondaǵy qosymshada «Avtopark» JShS-niń keıbir baǵyttaǵy avtobýstary kórinbeı tur. Ol baǵytqa qaladaǵy basqa úsh tasymaldaý kompanııasynyń avtobýstary qyzmet kórsetip jatyr», - dep habarlady qala ákiminiń baspasóz qyzmeti.
Aqtóbedegi tasymaldaýshy kompanııa júrgizýshiler narazylyǵynyń birneshe sebebin atady.
«Keshe saǵat shamamen 16:00-de júrgizýshiler jumysty toqtatatynyn aıtyp, eskertti. Kompanııa júrgizýshilerdiń syıaqysyn qıyp tastady. Sebebi olar valıdatorlardy isten shyǵarǵan, sóndirip tastaǵan, jolaýshylardyń qolma-qol tólegen jolaqysyn ózderi ıemdengen, ekinshi deńgeıli bank kartasyna aýdarýdy talap etedi jáne syzbaǵa sáıkes júrmeıdi, marshrýtty erte toqtatady. Bári jınaqtalyp, akti jasaldy. Syıaqydan qaǵylǵan soń 10-15 júrgizýshi uıymdastyryp, birneshe baǵytty toqtatty. Qala ákimdigi birden basqa tasymaldaýshylardy shyǵardy. Búgin de avtobýstardyń 58-i toqtap, 73-i shyqty. Júrgizýshilerdi jınap, sóılese almadyq. Bir-eki adam kelip, demalysqa shyqqysy keletinin aıtty. Eńbekaqy ýaqytyly beriledi. 250-400 myń teńge. Oǵan rıza emes», - dedi «Avtopark» JShS zańgeri Rýslan Jylqamanov.
Júrgizýshiler syıaqyny tolyq tóleý jáne jalaqyny kóterý týraly talap qoıyp otyr.
Al tasymaldaýshy kompanııa jańa júrgizýshiler izdep, kelisimge kelgenderimen qaıta sóılesýdi maqsat etip otyr.
Aqtóbe qalasy ákiminiń baspasóz qyzmetiniń habarlaýynsha, tasymaldaýshy kompanııa erteń qoǵamdyq kólik tasymaly qalypty jumysqa kóshedi dep ýáde etken.
Foto: Altynaı Saǵyndyqova
