Aqtóbede birinshi toqsanda 400-ge jýyq adam qylmystyq jaýapqa tartyldy
AQTÓBE. KAZINFORM — Úsh aıda oblystaǵy sottarda 444 qylmystyq is qaraldy. Sotqa túsken úsh is boıynsha aqtaý úkimi shyqty.
Aqtóbe oblystyq soty birinshi toqsandy qorytyndylady. Úsh aı ishinde sottarda 505 aıyptalýshyǵa qatysty 444 qylmystyq is qaraldy. Onyń ishinde 393 adamǵa qatysty 348 is boıynsha úkim shyǵarylǵan. Úsh aıyptalýshy aqtalyp, sot zalynan bosap shyqty. Aqtóbe oblystyq soty baspasóz qyzmetiniń habarlaýynsha, sottalǵandar arasynda bas bostandyǵynan aıyrý jazasyna kesilgenderdiń úlesi 10,7% qurady.
— Azamattyq is sany kóbeıdi. Oblys sottary 6 390 isti qarady. Ótken jyldyń sáıkes kezeńimen salystyrǵanda myńǵa jýyq iske artyq. Onyń ishinde 34,6% jeńildetilgen is júrgizý tártibimen qaraldy. Al 40% jýyǵy medıatsııa arqyly sheshildi. Sonymen birge birinshi toqsanda oblys sottary 355 ákimshilik isti aıaqtady, ıaǵnı ósim 22,5% qurap otyr. Onyń 35,2% qaralyp, sheshim shyǵaryldy. Oblystyq sot tóraǵasynyń mindetin atqarýshy Álibek Ahmetov isterdi qaraý sapasyn arttyrýǵa jáne sot sheshimderiniń kúshin joıýǵa, ózgertýge jol bermeýge baǵyttalǵan birqatar mindetter qoıdy, — dep habarlady Aqtóbe oblystyq sotynyń baspasóz qyzmeti.
Eske salsaq, naýryz aıynda Aqtóbe qalasynda jáne aýdandarda 12 sýdıa qyzmetke kiristi. Al oblystyq sot tóraǵasy basqa qyzmetke aýysty. Ázirge oblystyq sottyń jańa tóraǵasy taǵaıyndalmady.
