Aqtóbede brazılııalyq djıý-djıtsýdan Arlan Grip Selection týrnıri ótip jatyr
ASTANA. QazAqparat - Aqtóbede jańadan boı kótergen Jekpe-jek saraıynda brazılııalyq djıý-djıtsýdan jáne sabmıshn faıtıngtan «Aqtobe Open - 2017» ashyq halyqaralyq Arlan Grip Selection týrnıriniń jalaýy jelbiredi, dep habarlaıdy QazAqparat.
Jarysqa elimizdiń túkpir-túkpirinen kelgen 200-ge jýyq jetkinshekter jáne eresekter ózara myqtyny anyqtady. Olardyń basym bóligi Batys Qazaqstan oblysynyń namysyn qorǵady.
«Biz Aqtóbe qalasynda týrnırdi ekinshi ret uıymdastyryp jatyrmyz. Jarystar kúntizbesin jasaǵan kezde biz barlyq oblystardy qamtý úshin,sol jerde ótetin týrnırlerdi engizemiz. Aqtóbeni tańdaǵan sebebimiz, ol Batys Qazaqstan oblysynyń qalalarynyń ishinde óte yńǵaıly ornalasqan.Sondyqtan kóptegen jergilikti sportshylar jarysqa qatysýǵa múmkindik alady. Ókinishke qaraı, kórshi elderden djıtserler ózderiniń jarys kestelerine baılanysty týrnırge qatysa almady. Biraq biz olardy jeltoqsan aıynyń 8-i men 10-y aralyǵynda Almatyda ótetin Arlan Grip Selection týrnıriniń fınalyna shaqyramyz»,- dep atap ótti Qazaqstandyq brazılııalyq djıý-djıtsý jáne grepplıng federatsııasynyń prezıdenti Tólegen Qumarov.
Ádettegideı, týrnır tóreshelerdiń ereje túsindirýmen bastaldy. Atalmysh jarys ADCC jáne IBJJF erejelerine sáıkes túrli salmaq dárejeleri boıynsha ótti. Búgin jarys jolyna «GI» nusqasy boıynsha 7 men 17 jas aralyǵynda jetkinshekter jáne eresekter shyqty.
«Men «Orda» klýbynda 3 jyl aınalysamyn. Bul jerge meni ákem alyp keldi. Osy sport túriniń alǵashqy qadamdaryn beınerolıkterdi kórip, úırendim. Meniń oıymsha, búgingi kúni djıý-djıtsý qarqyndy damyp keledi. Ózimniń bapkerimnen úlgi alamyn. Bolashaqta sol kisige uqsap, kóptegen belesterdi baǵyndyrǵym keledi», - dep óz oıymmen bólisti jarys jeńimpazy Shahan Esenkeldın.
Jeńimpazdar men júldegerler dıplom men medaldermen marapattaldy. Endi, týrnırdiń sońǵy kúninde eresekter «NO GI» nusqasy boıynsha baq synaıdy.
Sporttyq sharanyń basty maqsaty Qazaqstanda djıý-djıtsýdy damytyp, elge tanytý, sport pen salaýatty ómir saltyn nasıhattaý, sportshylardyń sheberlikterin arttyrý, úzdikterdi anyqtaý.
