Aqtóbede bir jylda 134 adam jol-kólik apatynan kóz jumdy
AQTÓBE. KAZINFORM – Qarsy jolaqqa shyǵý, jyldamdyqty asyrý, uıyqtap ketý – negizgi sebepter. Jol-kólik apattary kezinde 3 myńǵa jýyq adam jaraqat alǵan.
Aqtóbe oblystyq PD ákimshilik polıtsııa basqarmasynyń bastyǵy Erkin Ótegen ótken jyldy qorytyndylady. Byltyr Aqtóbede 2007 jol-kólik oqıǵasy boldy. Saldarynan 134 adam kóz jumdy. Al 2919 adam túrli jaraqat aldy.
- Byltyr jol-kólik oqıǵasynyń kóbi qala syrtynda boldy. Bir jol apaty kezinde 5-6 adam, tipti 12 adamǵa deıin qaza tapty. Negizgi sebebi – júrgizýshilerdiń tártipsizdigi. Qarsy jolaqqa shyǵyp ketedi, jyldamdyqty asyrady, jazda uıyqtap ketedi. Kameralar qondyrylyp, jol belgileri ornatyldy. Al mektep janyna 27 jasandy jol kedergisi qoıyldy. Jumys bıyl taǵy jalǵasady,- dedi Aqtóbe oblystyq PD ákimshilik polıtsııa basqarmasynyń bastyǵy Erkin Ótegen.
Aqtóbe qalasyna byltyr 66 beınebaqylaý kamerasy ornatyldy. Bıyl taǵy 20-y iske qosyldy. Aqtóbe oblystyq PD ákimshilik polıtsııa basqarmasy tek júrgizýshiler men jaıaý júrginshilerdiń emes, jol kútimine jaýapty merdigerlerdiń jumysyn tekseredi. Respýblıkalyq, oblystyq jáne qala joldary boıynsha byltyr 380 ákishilik hattama toltyrylyp, aıyppul salyndy.
Aıta keteıik, byltyr Áıteke bı aýdany Belqopa aýyly mańynda júk kóligi men jolaýshylar tasymaldaıtyn shaǵyn avtobýs soqtyǵysty. Saldarynan 12 adam qaza tapty.
Іs sotqa jetkenimen, qos júrgizýshiniń qaza tapqanyna baılanysty qysqartylyp, polıtsııaǵa jeke qaýly shyǵaryldy.
