Aqtóbede bir jarym jylǵa jetetin mal azyǵy daıyndalady

AQTÓBE. KAZINFORM – Aqtóbede bıyl 2,7 mln tonna mal azyǵy jınalady. Bul bir jarym jylǵa jetkilikti. 

Aqtóbede shóp shabý, mal azyǵyn daıyndaý jumysy jalǵasyp jatyr.

– 2024-2025 jyldary 918 myń bas mal qystaıdy dep josparlanǵan. Oǵan 1,8 mln tonna shóp qajet. Bizde klımattyq jaǵdaı eskerildi. Qys uzap ketýi múmkin dep sharýalarǵa bir jarym jyldyq mal azyǵyn daıyndaý tapsyryldy. Bıyl 2,7 mln tonna mal azyǵy daıyndalady. Oǵan tolyq múmkindik bar. Oblysta aýyl sharýashylyǵy maqsatyndaǵy jer kólemi 26,9 mln gektardy quraıdy. Onyń 25,3 mln ga jeri jaıylym bolsa, 465 myń ga jeri shabyndyq, - dedi Aqtóbe oblystyq Aýyl sharýashylyǵy jáne jer qatynastary basqarmasy bóliminiń bas mamany Ermek Ádilbek.

Shóp shabý, mal azyǵyn daıyndaý jumystaryna 10 myńnan astam tehnıka jumyldyrylǵan. 

Aıta keteıik, qazirgi kezde bir jarym jyldyq jospardyń 70%-ǵa jýyǵy oryndaldy. Sharýalar men aqtóbelikter bir jylǵa qajetti mal azyǵyn jınap aldy. 

Eske salsaq, óńirde astyq jınaý jumysy da júrip jatyr. Aqtóbe oblysynda bıyl 600 myń gektardan astam jerdiń 432 myń gektaryna dándi daqyl, 62 myń gektaryna maıly daqyl egildi. Mal azyǵy úshin 94 myń gektar jer bólindi.