Aqtóbede bir jarym shaqyrymdyq jol qurylysy eki jylǵa sozyldy

Aqtóbe qalasyndaǵy shaǵyn aýdanda 22 kóshege jóndeý jumysy júrgizilýge tıis. Joba 2024 jyly qolǵa alynyp, áli jalǵasyp jatyr. Byltyr alty kóshe jóndelip, 600 mln teńgege jýyq qarjy jumsaldy. Al bıyl 2,2 shaqyrym bolatyn eki jolǵa 500 mln teńge qarastyryldy.

— Bıyl kún jańbyrly bolyp, qurylys toqtap turdy. Qazir qaıta jandandy. Jol negizdemesi daıyndalyp jatyr. Merdiger mekemeniń aqparatyna súıensek, tamyz aıynda asfalt tóseledi. Іrgeles jatqan Halıda Mamanova kóshesinde de negizdeme jasalady. Eki kósheniń uzyndyǵy — 2 shaqyrym 200 metr. 500 mln teńge oblystyq bıýdjetten bólindi. Bıyl eki kóshe ǵana josparlandy. Negizi 2024 jyly kelisimshart jasaldy. 2025 jyldan bastap qurylys jumystary júrgizildi. Joba 22 kósheni qamtıdy. Bári qarjylandyrýǵa sáıkes kezeń-kezeńimen atqarylady, — dedi Aqtóbe qalalyq TÚKSh, jolaýshylar kóligi jáne avtomobıl joldary bóliminiń sektor meńgerýshisi Eset Kenjebek.

22 kóshege arnalǵan jobaǵa jaýapty bas merdiger jumysty qosalqy merdigerge tapsyrǵan. Alǵashynda uzyndyǵy bir jarym shaqyrym bolatyn Isataı Taımanov kóshesindegi asfalttyń joǵarǵy qabaty qyrylyp, qaıta tóseldi. Jol kóktemde qarmen birge erip, qosalqy merdigermen arada kelisimshart úzildi. Byltyr jumysty ózge merdiger jalǵastyrdy.

— Bas merdiger jumysty 2024 jyly alǵan. Bizdiń aldymyzdaǵy qosalqy merdiger jobany durys bastamaǵan. Al biz 2025 jyldan bastap 5 kóshege asfalt saldyq. Jalpy uzyndyǵy — 3 shaqyrym. Bıyl tapsyrys berýshi Taımanov kóshesin jóndeýdi bizdiń josparǵa engizdi. 500 mln teńge qarjy bóligin tur. Qazirgi tańda jumys istep jatyrmyz. Taımanov kóshesi — 1490 metr. Birinshi jyly salynǵan joldyń buzylý sebebi — jerasty sýynyń kóterilýi. Buryn sý jınalatyn jer bolǵan soń negizi álsiz jol buzylyp qalǵan. Negizdemeni qazyp alyp tastap, ornyna úlken tastar men qıyrshyq tas tósep, bekitildi. Munyń barlyǵy jobada joq. Qujattaryn ózgertip, quzyrly organdardan qaıta ruqsat alyp jatyrmyz, — dedi qosalqy merdiger kompanııanyń ınjenerlik-tehnıkalyq jónindegi ınjeneri Abylaıhan Jýmın.

Merdiger qurylysy eki jylǵa sozylǵan jol jobasyn kelesi aıda aıaqtaýdy josparlap otyr. Ázirshe turǵyndar aıaldamaǵa jetý úshin birneshe shaqyrym jaıaý júrýge májbúr. 

— Egde jastaǵy adamdarǵa birneshe shaqyrym jaıaý júrý qıyn. Ózim jarty jolda aıaldap, demalyp alamyn. Qazir qoǵamdyq kólik aýyldyń eki shetindegi tasjol arqyly ǵana júredi. Men munda 2000 jyldan beri turamyn. Ol kezde jol bolmady, balshyq keship júrdik. Aıaǵymyzǵa paket, rezeńke etik kıdik. Keıin jol saldy, biraq ol qıyrshyq tas edi. Eki jyl buryn jumysty bastap, aıaqtamady. Byltyr osy mańda kólik balshyqqa batyp jatty, — dedi qala turǵyny Dáýletrııar Ismaılov.

Aıta keteıik, byltyr Aqtóbe óńirinde 26 is sotqa tústi. Onyń 17-i qalada, 9-y aýdandarda. Kóbine tapsyrys berýshi jumysyn tıisti deńgeıde oryndamaǵan merdigerdiń ústinen aryz túsirgen. Ásirese josyqsyz dep tanýdy surady.

Buǵan deıin habarlaǵanymyzdaı, Ońtústik batys turǵyn alabynyń turǵyndary sońǵy eki jylda máseleni jıi kóterip júr.