Aqtóbede bir úıdiń 5 balasy anasyna arasha surady
AQTÓBE. KAZINFORM — Esbolovtar otbasyndaǵy 5 bala qazir páter jaldap turady. Al anasy Juldyz Tleýf óziniń júıke aýrýyna shaldyqpaǵanyn rastaý úshin Almatydaǵy emdeý ortalyǵynda tekserilip júr. Otbasynyń tuńǵyshy Quralaı Esbolatova osy jaǵdaıǵa jetkizgenderdiń jaýapqa tartylýyn surady.
Esbolovtar otbasy Aqtóbe oblysy Qobda aýdanynda turǵan. Keıin erli-zaıypty ajyrasyp, anasy men balalary Aqtóbe qalasyna qonys aýdarady. Úıdiń tuńǵyshy Quralaı áleýmettik jelidegi paraqshasynda naǵashylarynyń arasyndaǵy daýdan soń anasynyń májbúrli túrde júıke aýrýyna shaldyqqandardy emdeıtin ortalyqqa jatyp shyqqanyn aıtyp, kómek surady. Onyń málimetine súıensek, baýyrlar arasyndaǵy múlikke talas sońynda anasy esepke alynǵan.
— Otbasyndaǵy beseýimiz de jaqsy oqımyz. Balalar balabaqshadan, mektepten qalǵan emes. Ózim tórtinshi kýrs stýdentimin. Anama balabaqsha, mektep, kolledjden jaqsy minezdeme berilip otyr. Biraq apam «balalar qaraýsyz qalǵan, sabaqqa barmaıdy, týǵan anasyn urdy, kóshede júredi, esi durys emes» dep aıtyp, minezdeme berdi. Dárigerge dál osylaı jazǵan. Anamdy ortalyqqa jatqyzǵan soń telefony naǵashy apamda qalǵan. Olar úıdi satty. Sonymen birge anamnyń telefony arqyly synyptastarynan, bizdiń synyptaǵy ata-analardan aqsha jınap alǵan. Meniń bank shotymdy da paıdalandy. Jınalǵan soma qomaqty eken. Munyń bárin estigen soń men jan-jaqtan kómek suradym. Anama shızofrenııa dıagnozyn qoıdy. Endi biz úı-kúısiz júrmiz. Bul bárimizdiń jolymyzdy japty. Sotqa aryz da túsirdik. Anam bolsa Almaty qalasynda baqylaýda jatyr. Olar dıagnozdyń ras nemese ótirik ekenin anyqtaıdy, — dedi vıdeoda Quralaı Esbolatova.
Aqtóbe oblysyndaǵy balalardy qorǵaý, qoldaý ortalyqtarynyń bári bul oqıǵa týraly biledi. Rasymen de 5 bala aldymen «Aıala» ortalyǵynda jatty.
— Bul otbasy «Aıala» ómirlik qıyn jaǵdaıdaǵy balalardy qoldaý ortalyǵyna bıyl 15 sáýir kúni keldi. Anasy ol kezde aýrýhanaǵa jatyp qalǵan eken. Anasy aýrýhanadan shyǵyp, 21 mamyr kúni Daǵdarys ortalyǵyna jiberildi. Sebebi anasy balalarymen birge barar jeri joq ekenin aıtqan. 102-ge habarlasyp, polıtsııa shaqyryp, sonda apardy. Áleýmettik jelige jarııalanǵan alǵashqy vıdeo sol sáýirde túsirilgen, — dedi «Aıala» ómirlik qıyn jaǵdaıdaǵy balalardy qoldaý ortalyǵynyń dırektory Gúlbarsha Jıenqulova.
Onyń aıtýynsha, kópbalaly otbasynyń kishkentaıy qazir 4 jasta, úlkeni bolsa kolledjde bilim alady.
Al Daǵdarys ortalyǵynyń basshysy Raısa Baılıevanyń aıtýynsha, mamyr aıynda ortalyqqa qonystanǵan otbasy 5 aı memleket qamqorlyǵynda boldy. Keıin anasy men úıdiń úlken qyzy qolhat jazyp, otbasy ortalyqtan shyǵyp ketti. Aqtóbe oblystyq bilim basqarmasy bolsa balalardyń bári de mektepke baryp, sabaq oqyp júrgenin habarlady. Kishkentaıy balabaqshada.
— Balalardyń ata-analary 2021 jyly zańdy túrde ajyrasqan. Ákeleri balalarynyń tárbıesine jáne turmystyq qajettilikterin óteý máselelerine aralaspaıdy. Analarynyń ata-analyq quqyǵy shektelmegen. Balalar anasynyń em qabyldaý kezeńinde ýaqytsha memleket qamqorlyǵyna alynyp, keıinnen ózine tabystaldy. Quzyrly organdardyń málimetine sáıkes, anasynyń atyna turǵyn úı tirkelmegen. Másele Aqtóbe oblysynyń bilim jáne balalardyń quqyqtaryn qorǵaý basqarmalarynyń turaqty baqylaýynda, — dep habarlady oblystyq bilim basqarmasynyń baspasóz qyzmeti.
Aıta keteıik, balalardyń anasy Juldyz Tleýf qazir Almatyda. Ol emdeý ornynda tekserýden ótip jatyr. Al balalar úıdiń tuńǵyshy Quralaı Esbolatovanyń janynda. Aqtóbe oblystyq jumyspen qamtý jáne áleýmettik baǵdarlamalar basqarmasynyń basshysy Lázzat Orazbaevanyń aıtýynsha, almatylyq dárigerlerdiń sheshiminen keıin ǵana qamqorshylyq suraǵy sheshiledi.
Al Balalardyń quqyǵyn qorǵaý komıtetiniń Aqtóbe oblysyndaǵy ýákili bul jaǵdaı baqylaýda bolǵanymen, istiń aq-qarasy ashylmaı tolyq aqparat bermeıtinin aıtty. Otbasymen kezdesip, mán-jaıdy anyqtamaq.
Eske salsaq, Atyraýda bir úıdiń eki balasy ata-anasynyń qaraýynsyz dalada túnep júrgeni anyqtaldy. Balalardyń quqyǵyn qorǵaý komıteti balalardyń ata-anasyn quqyǵynan aıyrý máselesi qaralatynyn aıtty.