Aqtóbede bir kúnde bes kópqabatty turǵyn úıdiń shatyry ushyp ketti
AQTÓBE. KAZINFORM - Aqtóbe qalasynda kópqabatty 5 turǵyn úıdiń shatyry ushyp ketti. Bul týraly tikeleı efırde qala ákimi Azamat Beket aıtty.
Aqtóbe qalasy boıynsha bir táýlikte 5 kóppáterli turǵyn úıdiń shatyry ushyp ketkeni belgili boldy. Olardyń bir bóligi Áýe qalashyǵy, Saıajaı, Qarǵaly turǵyn alaptarynda ornalasqan úıler. Aldaǵy ýaqytta qurylys jumysyn júrgizgen eki kompanııa qalpyna keltirip berdi. Al taǵy bir úıdi turǵyndardyń ózi jóndeýi tıis. Jergilikti atqarýshy organ tek tehnıka bólemiz dep ýáde berdi.
«Biz qazir barlyq kommýnaldyq qyzmetti kúsheıtilgen rejımge kóshirdik. Qazir qar tazalaý, qoǵamdyq kólik jumysy nazardan tys qalyp jatqan joq. Birneshe baǵyt boıynsha qoǵamdyq kólik qatynamady. Polıtsııa ruqsat bergen soń, aýa raıy qalpyna kelgende qatynas qaıta qalpyna keledi. Qar tazalaý jumysyna keler bolsaq, eldimekende boran saldarynan jumys toqtaǵan bolatyn. Alaıda turǵyn alaptarynyń negizgi, qalanyń ortalyq joldary jáne de qalanyń joldarynda jumys jalǵasa berdi. Turǵyn alaptarynda merdiger mekeme tehnıkasy tur. Olar jumysty atqarady», - dedi Aqtóbe qalasynyń ákimi Azamat Beket.
