Aqtóbede bir kún ishinde jol erejesin 12 ret buzǵan júrgizýshi ustaldy
AQTÓBE. KAZINFORM — Reseılik taksı júrgizýshisi 11 aıda jol erejesin 250 ret buzyp, 7,7 mln teńge teńge aıyppul arqalaǵan.
Aqtóbe oblystyq polıtsııa departamenti jol erejesin jıi buzatyn júrgizýshini anyqtaý, ustaý sátin vıdeoǵa túsirip, taratty. Qarǵaly aýdandyq polıtsııa bóliminiń qyzmetkerleri taksı júrgizýshisin jol boıynda toqtatqan. Aqtóbe men Reseıdiń Orsk qalasy arasynda jolaýshy tasymaldaıtyn taksı qyzmetkeriniń kóligi turaqqa qoıyldy.
— Sońǵy 11 aı ishinde jol erejesin 250 ret buzǵan, tipti odan da asady. Jınaqtalǵan aıyppuldardyń jalpy somasy - 7,7 mıllıon teńgeden joǵary. Eń ókinishtisi - júrgizýshi bir kún ishinde 12 ret jol erejesin buzǵan. Negizgi quqyq buzýshylyq – jyldamdyqty shamadan tys asyrý. Bul óz kezeginde jolaýshylardyń ómirine tikeleı qaýip tóndirip otyr. Sebebi sheteldik azamattyń Aqtóbe – Orsk baǵyty boıynsha jolaýshylardy tasymaldap júrgeni anyqtaldy. Qazir quqyq buzýshynyń avtokóligi arnaıy turaqqa qoıyldy. Kóligin tek barlyq aıyppuldy tolyq ótegennen keıin ǵana qaıtara alady, — dep habarlady Aqtóbe oblystyq PD baspasóz qyzmeti.
Aıta keteıik, Pavlodarda jol apatynan eki júrgizýshi qaza tapty. Taǵy bir jolaýshy aýrýhanaǵa jatqyzyldy. Polıtsııa jol-kólik oqıǵasy boıynsha sotqa deıingi tergeý júrgizip jatyr.