Aqtóbede bir aıda 4 balany jylan shaǵyp aldy
AQTÓBE. KAZINFORM – Aqtóbe qalasynda eki, Hromtaý qalasynda eki derek tirkeldi. Tótenshe jaǵdaılar qyzmeti tabıǵat aıasyna shyqqan kezde asa saq bolýdy eskertti.
Aqtóbede jazdyń sońǵy aıynda jylan shaǵý deregi tirkelip jatyr. Adamdar tabıǵat aıasynda tynyqqanda, saıajaı aýmaǵynda jáne dalada asa saq bolýy kerek.
- Tamyz aıynda oblysta 4 balany jylan shaǵyp aldy. Onyń ishinde Aqtóbe qalasynda – 2 jaǵdaı, Hromtaý qalasynda – 2 jaǵdaı tirkeldi. Jylan kóbine eldi mekenderdiń shetinde, shóbi qalyń jerde, tastyń, aǵashtyń jáne túrli qurylys materıaldarynyń arasynda, sý aıdyndaryna jaqyn aýmaqtarda kezdesýi múmkin. Jylan adamdy ádeıi qýmaıdy, kóbine qaýip tóngen jaǵdaıda qorǵaný maqsatynda shaǵady,- dedi Aqtóbe oblystyq TJD baspasóz qyzmeti.
Saqtyq úshin balalarǵa mynany eskertý kerek:
- jylanǵa jaqyndaýǵa bolmaıdy jáne bala ony qýalamaý kerek;
- qalyń shóp, buta arasyna, tas nemese aǵashtyń astyna qol suqpaǵan jón;
- tabıǵat aıasynda tynyqqanda jabyq aıaq kıim jáne uzyn shalbar kıgen durys;
- balalar oınaıtyn aýmaqty únemi qarap, qalyń shópti ýaqytyly shabý kerek;
- shatyrdy qarap, tósek-oryn, kıim jáne aıaq kıimdi qaǵyp-silkip alǵan durys.
- Jylan shaqqan jaǵdaıda adamdy kóp qozǵaýǵa bolmaıdy. Balany jatqan kúıinde aýrýhanaǵa jetkizý qajet. Kóp sý bergen durys. Shaqqan oryndy tańyp tastaýǵa, kesýge, kúıdirýge bolmaıdy. Óz betinshe emdeý qaýipti,- dep habarlady Aqtóbe oblystyq TJD baspasóz qyzmeti.
Aıta keteıik, Almaty oblysyndaǵy Kólsaı kólderi aýmaǵynda jylan shaqqan 16 jastaǵy jasóspirimge Tótenshe jaǵdaılar mınıstrliginiń qutqarýshylary jedel kómek kórsetti.
