Aqtóbede bir aýyldan shyqqan 13 sarbaz avıatsııa mamandyqtaryn meńgerip jatyr
ASTANA. KAZINFORM — Aqtóbedegi Áýe qorǵanysy kúshteri áskerı ınstıtýtynyń kishi avıatsııalyq mamandar daıarlaý ortalyǵynda Qyzyltóbe aýylynan áskerge shaqyrylǵan 13 áskerı qyzmetshi merzimdi áskerı qyzmetin ótep júr.
QR Qorǵanys mınıstrligi baspasóz qyzmetiniń málimetinshe, shaǵyn ǵana aýyl úshin bul jaı ǵana sáıkestik emes, erekshe maqtanysh. Bir kóshede ósip, bir mektepte bilim alǵan, bala kúnnen qalyptasqan dostyqtaryn ásker qatarynda da saqtap qalǵan jerlester búginde ıyq tirese Otan aldyndaǵy boryshyn atqaryp keledi.
Olardyń qatarynda Toqtar, Talas, Nurtas, Jasulan Naýryzbaı, Azamat, Arman, Aıdos, Nurmuhammed, Erbol, Jasulan Qalabaı, Dáýren, sondaı-aq aǵaıyndy Nurdáýlet pen Erdáýlet Muhammedınder bar. Merzimdi áskerı qyzmetti birge ótkerýge sanaly túrde sheshim qabyldaǵan jigitter búginde áskerı mamandyqty qatar meńgerip, daıyndyqtyń ár kezeńinde bir-birine qoldaý kórsetip keledi.
Qyzmet barysynda jas sarbazdar áskerı avıatsııanyń qyzmetin qamtamasyz etýge qajetti suranysqa ıe áskerı-tehnıkalyq mamandyqtardy ıgerip jatyr. Olar avtomobıldik ottegi quıý stantsııasyn, aerodromdyq quramdastyrylǵan dala mashınasyn, aerodromdyq jyljymaly agregatty jáne aerodromdyq janarmaı quıý tehnıkasyn paıdalaný men qyzmet kórsetýdi úırenip jatyr. Tájirıbelik sabaqtar barysynda áskerı qyzmetshiler ushý qaýipsizdigi men úzdiksiz ushý úderisin qamtamasyz etýde mańyzdy ról atqaratyn arnaıy aerodrom tehnıkasymen jumys isteý daǵdylaryn da meńgeredi.
— Biz bir aýylda óstik. Bala kúnimizden bir-birimizdi jaqsy tanımyz. Sondyqtan armııada da ózimizdi bir ujymnyń múshesindeı sezinemiz. Jańa mamandyqtardy birge meńgerip, sabaq barysynda bir-birimizge qoldaý kórsetemiz. Biz tek ózimiz úshin emes, týǵan-týystarymyz, týǵan aýylymyz jáne elimiz úshin qyzmet etip júrgenimizdi jaqsy túsinemiz. Bul — biz úshin úlken mártebe ári zor jaýapkershilik, — deıdi qatardaǵy jaýynger Arman Orazbekov.
Oqý baǵdarlamasy teorııalyq daıyndyq pen qarqyndy tájirıbelik sabaqtardy ushtastyrady. Áskerı qyzmetshiler arnaıy tehnıkanyń qurylymy men paıdalaný tártibin meńgerip, túrli jaǵdaıda is-qımyl jasaýǵa mashyqtanyp, avıatsııalyq bólimderdiń aerodromdyq-tehnıkalyq qamtamasyz etilýine qajetti kásibı daǵdylardy ıgeredi.
Mınıstrlik atap ótkendeı, Qyzyltóbeden shyqqan 13 aýyldastyń oqıǵasy — týǵan jerge degen súıispenshiliktiń, ózara qoldaýdyń jáne jaýapkershiliktiń jarqyn úlgisi. Olar ásker mektebinen birge ótip, bir-birine demeý bolyp, óz isterimen Otanǵa degen súıispenshilik týǵan aýyldan bastalatynyn dáleldep júr.
Qyzyltóbe turǵyndary úshin olardyń áskerı qyzmeti erekshe maqtanyshqa aınalsa, jas býyn úshin bul — Otan qorǵaýdyń adamdardy biriktirip, minezdi shyńdaıtynyn ári zamanaýı áskerı mamandyqtardy meńgerýge jol ashatynyn kórsetetin jarqyn úlgi. Ásirese dostarymen qatar týǵan aǵaıyndy azamattardyń da birge qyzmet atqarýy erekshe mánge ıe. Bul týǵan elge adaldyq pen Otanǵa qyzmet etý dástúriniń urpaqtan-urpaqqa jalǵasyp kele jatqan otbasylyq qundylyq ekenin aıqyn kórsetedi.
Budan buryn habarlanǵandaı, kókshetaýlyq egizder Ulttyq ulanda birge qyzmet etip júr.
