Aqtóbede bir apta buryn iz-túzsiz ketken dárigerdiń denesi tabyldy
AQTÓBE. KAZINFORM — Qazirgi kezde qylmystyq is qozǵalyp, kúdikti ustaldy.
Nefrolog Abaı Aısaǵalıevtiń týystary ony 23 mamyr kúni úıden shyǵyp, qaıta oralmaǵanyn polıtsııaǵa habarlaǵan. Keıin eriktiler de izdeý jumystaryn júrgizdi.
— Aqtóbe qalasynda 1956 jyly týǵan, buryn habarsyz ketken er adamdy óltirdi degen kúdikpen 31 jastaǵy turǵyn ustaldy. Qazirgi ýaqytta oǵan qatysty barlyq qajetti tergeý amaly júrgizilip jatyr. Kúdikti ýaqytsha ustaý ızolıatoryna qamaldy. Tergeý múddesine baılanysty ózge málimetter jarııalanbaıdy, — dep habarlady oblystyq PD baspasóz qyzmetiniń jetekshisi Erbolat Sarqulov.
Eske salsaq, Aqtóbede eki balasyn tunshyqtyryp óltirgen ananyń isi sotta qarala bastady. Qazir 29 jastaǵy aıyptalýshy Talǵar psıhologııalyq aýrýhanasynda em alyp jatyr. Al sot-medıtsınalyq saraptama kezinde balalardyń mehanıkalyq asfıksııadan kóz jumǵanyn anyqtady.