Aqtóbede boıjetkendi kóligimen qaǵyp óltirgen stýdent sottaldy
AQTÓBE. QazAqparat - Aqtóbede 19 jastaǵy Sıýzanna Gamıdovanyń ólimine sebepker bolǵan Sezim Samuratqa sot úkimi shyqty, dep habarlaıdy QazAqparat tilshisi.
Aqtóbe qalasyndaǵy Ábilqaıyr han dańǵyly boıymen kele jatqan Sezim Samurat janyna jaqyndaǵan kólikten qorqyp, róldi ońǵa qaraı kenet burǵan. Sol kezde saıabaqta serýendep júrgen Sıýzanna Gamıdova men Maqsut Anapındi qaǵyp ketti. Oqıǵa ornynda Almatydan Aqtóbege bir aptaǵa kelgen Sıýzanna Gamıdova qaza boldy.
Buǵan deıin habarlaǵanymyzdaı, Sezim Samurat jyldamdyqty asyryp, saǵatyna 91 shaqyrymmen júrgen. Sot zalynda ol qaza bolǵan Gamıdovanyń týǵan-týystarynan, anasynan keshirim surady. Іs materıaldaryna súıensek, qaza bolǵan boıjetken bas-mı jaraqatyn alǵan. Bas súıegi synyp, kóp qan ketýden kóz jumdy.
Sottalýshy Sezim Samurat búgin sotta sońǵy sózin aıtyp, taǵy da keshirim surady.
«Men ádeıi jasaǵan joqpyn. Jeńil jaza taǵaıyndaýyńyzdy suraımyn. Jábirlenýshilerden keshirim suraımyn. Olar maǵan keshirim berdi», - dedi Sezim Samurat.
Kóp uzamaı sot úkimi shyqty.
«Sezim Samurat Qylmystyq kodekstiń «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» baby boıynsha aıypty dep tanylyp, 2 jyl 6 aıǵa bos bostandyǵanan aıyrý jazasy taǵaıyndalsyn. 5 jylǵa kólik basqarý quqyǵynan aıyrylsyn. Qylmystyq kodekstiń «Shartty túrde sottaý» babymen bas bostandyǵynan aıyrý jazasyn shartty dep tanýǵa qaýly etemin»,- dedi sýdıa Dınara Gılmanova.
Sottalýshy Sezim Samurat jaza merzimin ótegenshe turǵylyqty meken jaıyn, oqý ornyn eskertýsiz ózgertpeıdi. Kóńil kóterý oryndaryna barýǵa tyıym salyndy.
