Aqtóbede borandy kúni jolda qalǵan adamdar qutqaryldy
AQTÓBE. QazAqparat - Aqtóbede borandy kúni jolda qalǵan adamdar qutqarylyp, 80 jastaǵy qarııa aýrýhanaǵa jetkizildi, dep habarlaıdy QazAqparat tilshisi.
4-5 naýryz kúnderi Aqtóbede boran bolyp, qazirgi ýaqytta «Aqtóbe -Rodnıkovka -Mártók» tasjoly jabyq. Keshe saǵat 12:35 mınýtta «Badamsha-Stepnoe» tasjolynda eki jeńil kólik qar qursaýynda qaldy. Kómek suraǵan soń qutqarýǵa «Órt sóndirý jáne avarııalyq-qutqarý jumystary» mekemesiniń №10,16 órt sóndirý bólimderinen 5 adam, 2 tehnıka jáne jeke kompanııadan 1 adam, 1 tehnıka jiberildi. Qutqarýshylardyń kúshimen 7 jolaýshy Badamsha aýylyna jetkizildi.
«Keshe Alǵa aýdany, Ushqudyq aýyldyq okrýgi Aqsazdy aýylynyń turǵyny aýyryp, aýrýhanaǵa jetkizý múmkin bolmady. 80 jastaǵy qarııany oblys ortalyǵyna ákelý úshin Jedel qutqarý jasaǵy jeke quramynan 2 adam jáne trekol, jergilikti ákimdikten 2 adam jiberildi. Naýqas qalalyq jedel járdem aýrýhanasyna jetkizildi», - dep habarlady oblystyq TJD baspasóz qyzmeti.
Búgin tańda «Kóptoǵaı-Oıyl» aýylaralyq tas jolynan 9 adam qutqarylyp, Oıyl aýdanynyń ortalyǵyna jetkizilgen.
«Búgin tańǵy saǵat 04:00-de «Samara-Shymkent» tasjolynda jeńil kólik qar qursaýynda qaldy. Shaqyrtý ornyna TJD «Jedel qutqarý jasaǵy» MM jeke quramynan 3 adam, 1 avtokólik jiberildi.Nátıjesinde qutqarýshylardyń kúshimen 2 jolaýshy Aqtóbe qalasyna jetkizildi», - dedi baspasóz qyzmeti.
