Aqtóbede borandy kúni jolda qalǵan adamdar qutqarylyp jatyr

AQTÓBE. KAZINFORM – Jolda qalǵan 6 kólikten 17 adam qutqaryldy. Tótenshe jaǵdaılar qyzmeti adamdardy jylytý beketine jetkizdi. 

Aqtóbe oblysynda qazir kún jyly bolǵanymen, boran soǵyp tur. Saldarynan birneshe baǵyttaǵy jol jabyldy. Eskertý elemegen keıbir júrgizýshiler jolǵa shyǵyp, keıin kómekke júgindi.

– Respýblıkalyq jáne oblystyq mańyzy bar jabyq joldy patrýldeý barysynda TJD qutqarýshylary qar qursaýynda qalǵan 4 jeńil avtokólikti shyǵardy. Kólikterdiń ishinde 11 adam bolǵan. Zardap shekkender joq, eshkimge medıtsınalyq kómek qajet bolmady. Bul Hromtaý aýdanynda bolǵan oqıǵan. Keıinirek Qarǵaly aýdanynda oblystyq mańyzy bar Dóń – Badamsha – Aqtóbe – Orsk avtojolynyń 65-shaqyrymynda 1 jeńil jáne 1 júk avtokóligin shyǵardy. Kólikterde 6 adam bolǵan. Barlyǵy da aman-esen qutqaryldy, - dep habarlady oblystyq TJD baspasó qyzmeti.

Aqtóbe oblystyq PD baspasóz qyzmetiniń habarlaýynsha, qazir polıtsııa joldardy kúzetip tur. Jeńil jáne júk kólikteriniń bári kempıngterge ornalasqan.

Aıta keteıik, Aqtóbe jáne Qostanaı oblysynda jol jabyldy. 2 oblystaǵy 4 respýblıkalyq mańyzy bar avtomobıl jolynda kólik qozǵalysyna ýaqytsha shekteý qoıylǵan.