Aqtóbede borandy kúni kólik aldyna túsip 36 km júgirgen qutqarýshylar marapattaldy
AQTÓBE. KAZINFORM – Tótenshe jaǵdaılar mınıstrligi aqtóbelik qutqarýshylardy marapattady. Olarǵa «Tótenshe jaǵdaıdaǵy erligi úshin» tósbelgisi, alǵys hat berildi.
Aqtóbe oblystyq TJD bastyǵy Nurǵalı Júnisov 6-10 aqpan kúnderi aralyǵynda óz jumysyn adal atqaryp, naýqastarǵa, jolda qalǵan adamdarǵa kómektesken bir top qyzmetkerge mınıstrlik marapatyn tabystady.
Hromtaý aýdany Tótenshe jaǵdaılar bóliminiń bastyǵy Arman Almaǵambetov, Oblystyq TJD Órt sóndirý qyzmeti № 6 órt sóndirý bóliminiń júrgizýshi-qyzmetkeri Meırambek Dospaev, «Jedel-qutqarý jasaǵy» RMM bas qutqarýshysy Aıqyn Ońalbaev «Tótenshe jaǵdaıdaǵy erligi úshin» tósbelgisin taqty.
Sonymen birge tótenshe jaǵdaılar qyzmetiniń 9 qyzmetkeri QR Tótenshe jaǵdaılar mınıstriniń gramotasyn aldy.
Olardyń qatarynda órt sóndirý avtokólikterin júrgizý jónindegi aǵa nusqaýshy, júrgizýshi-qyzmetkeri, órt sóndirýshi-qutqarýshylar bar.
№ 8 órt sóndirý bóliminiń órt sóndirýshi-qutqarýshysy Amanjol Jalǵasov, № 9 órt sóndirý bóliminiń órt sóndirýshi-qutqarýshysy Álimbek Tórebekov, № 6 órt sóndirý bóliminiń órt sóndirýshi-qutqarýshysy Asylhan Qanatbaev, № 8 órt sóndirý bóliminiń bólimshe komandıri Nurbolat Tájiǵulov, «Jedel-qutqarý jasaǵy» RMM bas qutqarýshysy Ǵalymbek Ábdijámilov mınıstrliktiń alǵys hatyn aldy.
Eske salsaq, № 8 órt sóndirý bóliminiń 8 qyzmetkeri borandy kúni Muǵaljar aýdanynyń Basshıli aýylynda naýqasqa kómektesý úshin kólik aldyna túsip jaıaý júgirdi.
Olar baryp qaıtý úshin 36 shaqyrymdy eńserdi.
