Aqtóbede boran saldarynan joldar jabylyp, ǵımarattar shatyry búlindi
AQTÓBE. QazAqparat – Aqtóbede boran saldarynan respýblıkalyq mańyzy bar joldar jabyldy, emdeý mekemeleri men turǵyn úılerdiń shatyry búlindi, dep habarlaıdy QazAqparat tilshisi.
«29 naýryz kúni saǵat 14:30 - 22:30 aralyǵynda Aqtóbe oblysynyń Tótenshe jaǵdaılar departamentiniń bólimsheleri Aqtóbe qalasy, Alǵa, Qarǵaly, Hromtaý aýdandarynda 8 avarııalyq-qutqarý jumysyn júrgizdi. Nátıjesinde 82 adam, onyń ishinde 12 bala qutqaryldy. Bári din aman. Qutqarý jumystaryna 25 qyzmetker men 9 tehnıka, sondaı-aq polıtsııa men jol qyzmetinen 55 qyzmetker men 35 tehnıka jumyldyryldy», - dep habarlady oblystyq TJD baspasóz qyzmetinen.
Vedomstvo aqparatyna sáıkes, Aqtóbe qalasynda qatty jeldiń saldarynan birneshe ǵımarattyń shatyr jabyndysy ushyp ketti.
«Oblystyq perınataldyq ortalyqtyń burynǵy ǵımaraty, kópqabatty úıdiń shatyry, oblystyq balalar klınıkalyq aýrýhanasy, Jańaqonys aýyly Komsomolskaıa kóshesindegi monsha shatyry zaqymdandy. Qatty jel bolǵan jaǵdaıda terezelerdi jaýyp, elektr jelisin shamadan tys júktemeýdi suraımyz. Kólikterdi aǵashtardyń, mańdaıshalardyń, jarnama qalqandarynyń jáne belgilerdiń janynda qaldyrýǵa bolmaıdy», - dep habarlady departamenttiń baspasóz qyzmetinen.
Sondaı-aq TJD habarlaýynsha, respýblıkalyq mańyzy bar eki ýchaske jabyldy: «Komsomol-Denısovka-Rýdnyı-Qostanaı», «Samara-Shymkent» tasjolynyń Aqtóbe qalasynan Qarabutaq aýylyna deıingi aralyq. Sondaı-aq oblystyq mańyzy bar «Aqtóbe-Rodnıkovka-Mártók», «Dóń-Badamsha-Aqtóbe-Or» jolynda qatynas ýaqytsha toqtady.
