Aqtóbede boran kúsheıip, birneshe baǵytta jol jabyldy

AQTÓBE. QazAqparat - Aqtóbede Samara-Shymkent, Aqtóbe-Orsk baǵytyndaǵy tasjoldyń birneshe bóligi jabyldy, dep habarlaıdy QazAqparat tilshisi.

Búgin saǵat 19:30-da boran kúsheıip, oblystyq mańyzy bar «Aqtóbe-Rodnıkovka-Mártók» tas jolynyń 42 shaqyrymynan 93 shaqyrymyna deıingi aralyqta barlyq avtokólik túrine qozǵalys toqtatyldy.

Sonymen birge saǵat 20:30-da respýblıkalyq mańyzy bar Aqtóbe-Orsk tasjolynyń Shámshi Qaldaıaqov aýyly men Reseıdiń Orsk qalasyna deıingi aralyǵy jabyldy.

Munda da barlyq kólik júrmeıdi.

«Samara-Shymkent» tasjolynyń Qobda aýdanynan Aqtóbe qalasyna deıin jáne Aqtóbe qalasynan Qarabutaq aýylyna deıingi aralyǵy jabyldy. Munda da boran soǵyp tur. Jel kúsheıdi. Joldaǵy qozǵalys kórinbeı, Dóń-Badamsha baǵytyna da shekteý qoıyldy«,- dep habarlady oblystyq TJD baspasóz qyzmeti.

Al Aqtóbe oblystyq PD baspasóz qyzmeti joldaǵy qaýipsizdik erejesin saqtaýǵa shaqyrdy.

Eske salsaq, búgin «QazAvtoJol» ulttyq kompanııasy aýa raıynyń rettelýine baılanysty tórt oblysda jol ashylǵanyn málim etti.

Jolshylar kúre joldardy qardan tazartyp, kóktaıǵaqqa qarsy materıaldarmen óńdeýdi jalǵastyrýda.