Aqtóbede boran kúni qar qursaýynda qalǵan adamdar qutqaryldy
AQTÓBE. QazAqparat – Aqtóbede birer kúnnen beri boran bolyp, joldar jabyldy. Tótenshe jaǵdaılar qyzmetiniń eskertýine qulaq aspaı, qar qursaýynda qalǵandar qutqaryldy, dep habarlaıdy QazAqparat tilshisi.
Aqtóbede ondaǵan adam qutqaryldy. Máselen, 25 qańtar kúni Qarǵaly aýdany, Stepnoı aýylynda júkti áıelden shaqyrý tústi. Jedel járdem brıgadasy aýdan ortalyǵyna jete almady. Shaqyrtý ornyna Órt sóndirý jáne avarııalyq-qutqarý jumystarynan úsh adam men bir tehnıka jiberildi. Nátıjesinde qutqarýshylardyń kómegimen jedel járdem avtokóligi qardan shyǵarylyp, bári aman qaldy.
Alǵa aýdanynda da naýqas jedel járdem shaqyryp, boran saldarynan medıtsınalyq kómek berýge múmkindik bolmady. Sol kezde Órt sóndirý jáne avarııalyq-qutqarý jumystary qyzmetinen úsh qutqarýshy men bir kólik jiberildi.
«Aqtóbe qalasy, Tabantal aýyly mańynda «Nıssan Patrol» avtokóligi qar qursaýynda qalǵan. Qutqarýshylar jiberilip, júrgizýshi óz alǵysyn jetkizdi. Al Temir aýdany, «Shubarqudyq-Bolgarka» tas jolynyń 15 shaqyrymynda 1 jenil avtokólik jolaýshylarymen qar qursaýynda turyp qalǵan jóninde aqparat kelip tústi. Shaqyrtý ornyna TJD «Órt sóndirý jáne avarııalyq-qutqarý jumystary qyzmeti» mekemesinen tórt adam men bir kólik jiberildi. Qutqarýshylar kúshimen 8 adam, onyń ishinde 1 júkti áıel qutqarylyp, Shubarqudyq aýylyna jetkizildi. Qaýip joq. Alǵa aýdany, Eset Batyr men Toqmansaı aýyly aralyǵynda 3 jeńil kólik qar qursaýynda turyp qalǵany jóninde aqparat tústi. Olarǵa da qutqarýshylar kómektesti», - dep habarlady oblystyq TJD baspasóz qyzmeti.
Aıta keteıik, jolda oqýshylar da qalyp qoıdy. Hromtaý aýdanynyń oqýshylary Orynbor oblysynyń Qýandyq aýylyna jarysqa barǵan. Úılerine qaıtar jolda olar Badamsha aýylyna jetkizildi. Bári agrotehnıka kolledjine ornalastyryldy. Voleıbol komandasynda 11 oqýshy men 4 jattyqtyrýshy bar. Bári aman-esen.
