Aqtóbede bopsalaý jáne tonaýmen aınalysqan 7 kúdikti ustaldy
AQTÓBE. KAZINFORM - Olar adamdy qorqytyp, aqsha alyp otyrǵan. Al jábirlenýshi nesıe rásimdep, depozıttegi aqshasyn da sheship bergen.
Aqtóbe oblystyq polıtsııa departamenti Uıymdasqan qylmysqa qarsy kúres basqarmasynyń qyzmetkerleri jáne arnaıy maqsattaǵy bólimshe jaýyngerleri qala turǵyndaryn bopsalaý jáne tonaýmen aınalysqan topty ustady. Olar at-jónsiz qaryzsyń dep aıtyp, kúsh kórsetken.
- Nesıe rásimdeýge jáne depozıttegi aqsha sheship berýge májbúrlegen. Osylaısha olar zańsyz jolmen 700 myń teńgeni ıemdenip, jábirlenýshige materıaldyq shyǵyn keltirgen. Júrgizilgen jedel-izdestirý is-sharalarynyń nátıjesinde polıtsııa qyzmetkerleri jeti kúdiktiniń jeke basyn anyqtap, olardy ustady. Barlyǵy ishki ister organdaryna jetkizildi,- dep habarlady Aqtóbe oblystyq PD baspasóz qyzmeti.
Qazir tergeý júrip jatyr. Kúdiktilerdiń taǵy kimderdi qorqytqany ázirge belgisiz. Polıtsııa uqsas oqıǵalardy izdeıdi.
Aıta keteıik, ІІM maýsymda ǵana elimizde bopsalaý qylmysy 15%-ǵa azaıǵanyn habarlady.
