Aqtóbede bomba týraly jalǵan habar taratqan stýdent ustaldy
AQTÓBE. QazAqparat – Aqtóbede Josaly aýylynda jarylǵysh zat bar dep habarlama bergen kúdikti ustaldy. Ol Qarǵaly aýdanynda turatyn stýdent bolyp shyqty, dep habarlaıdy QazAqparat tilshisi.
13 jeltoqsan kúni saǵat 01:30 shamasynda Aqtóbe oblysy PD Qarǵaly aýdandyq PB kezekshi bólimine er adam qońyraý shaldy.
Onyń aıtýynsha, Qarǵaly aýdanynyń Josaly aýylyna bomba qoıylǵan.
Oqıǵa ornyna polıtsııa jasaqtary, avarııalyq-qutqarý qyzmetiniń qyzmetkerleri, Qarǵaly aýdanynyń jedel medıtsınalyq járdem brıgadasy jiberildi.
«Jedel izdestirý sharalaryn júrgizý barysynda ýchaskelik polıtsııa ınspektory kúdikti retinde 18 jastaǵy jergilikti turǵyndy ustady. Ol kolledj stýdenti bolyp shyqty. Jas jigit ázildep aıtqanyn moıyndady. Qylmystyq kodekstiń «Terrorızm aktisi týraly kórineý jalǵan habarlaý» baby boıynsha sotqa deıingi tergeý bastaldy. Kúdikti ýaqytsha ustaý ızolıatoryna qamaýǵa alyndy», - dedi oblystyq PD baspasóz qyzmetiniń jetekshisi Erbolat Sarqulov.
Aıta keteıik, kúdiktiniń kinási dáleldense 5000 AEK deıingi mólsherde aıyppul salynady.
Tipti túzetý jumystaryna tartylyp, 5 jylǵa deıin bas bostandyǵyn shekteý nemese sol merzimge bas bostandyǵynan aıyrý jazasy qarastyrylǵan.
