Aqtóbede bokstan el birinshiligi ótedi

AQTÓBE. QazAqparat – Táýelsizdiktiń 30 jyldyǵyna jáne Qajymuqan Muńaıtpasulynyń 150 jyldyǵyna oraı Aqtóbede bokstan el birinshiligi ótedi, dep habarlaıdy QazAqparat tilshisi.

2005-2006 jyly týǵan jasóspirimder arasyndaǵy QR chempıonaty 31 qańtar – 6 aqpan aralyǵynda Aqtóbe qalasyndaǵy Jekpe-jek sport saraıynda ótedi.

Pandemııaǵa baılanysty sanıtarlyq normalar qatań saqtalyp, jarys kórermensiz ótedi.

«Birinshilikke elimizdiń barlyq oblysy men Shymkent, Nur-Sultan, Almaty qalalarynyń quramalary qatysady. 14 salmaq dárejesinde 250-den astam sportshy ózara myqtyny anyqtaıdy (44kg, 46 kg , 48 kg , 50 kg, 52 kg, 54 kg, 56 kg, 60 kg, 63 kg, 66 kg, 70 kg, 75 kg, 80 kg, 80 kg +). Olardyń arasynda respýblıkalyq, halyqaralyq dodalardyń jeńimpazdary bar. Chempıonatta top jarǵandar ulttyq qurama sapyna alynatyn bolady. Іriktelgen sportshylar Azııa jáne álem chempıonatyna barady», - dep habarlady oblystyq Sport jáne dene shynyqtyrý basqarmasynyń baspasóz hatshysy Erlan Muqan.

Aıta keteıik, 2019 jyly bul chempıonat Jambyl oblysynyń Shý qalasynda ótti. Aqtóbelik jas boksshylar 1 altyn, 2 kúmis jeńip alǵan edi. Al jalpy komandalyq esepte bas júldeni Jambyl oblysy ıelendi. Kúmis tuǵyr shymkenttikterge buıyrsa, úzdik úshtikti Almaty oblysy túıindegen bolatyn.