Aqtóbede bógetterdi jóndeý jumysy júrip jatyr
AQTÓBE. KAZINFORM - Aqtóbeniń Mártók aýdanynda bógetti jóndeý jumysy júrip jatyr. Oblys boıynsha bul jumystar qarasha aıyna deıin jalǵasady.
Aqtóbe oblysynyń ákimi Ashat Shaharov Mártók aýdanyna baryp, ondaǵy Mártók, Qazan-2 jáne Sarjansaı bógetteriniń jaı-kúıimen tanysty. Aqqaıyń aýylyndaǵy Mártók bógeti 1990 jyly qoldanysqa berilgen. Sodan beri jóndi jóndeý júrgizilmedi. Qazirgi kezde munda qaıta qalpyna keltirý, sonyń ishinde qubyr, shlıýz salý jumysy atqarylyp jatyr. Jumys shilde aıynda aıaqtalýy tıis. Aldaǵy ýaqytta bógettegi sý aýyl sharýashylyǵy maqsatynda paıdalanylady. Al Mártók aýylyndaǵy Qazan-2 bógeti byltyr jóndeldi. Oǵan 107,4 mln teńge jumsaldy. Nátıjesinde kóktemgi sý tasqyny kezinde bóget qarǵyn sýdy ustaýǵa, Qazan jáne Mártók aýyldarynyń jańa qurylys aýmaǵyn aman alyp qalýǵa kómektesti.
- Bul aýdandaǵy Sarjansaı jáne Saryjar aýyldarynda bógetter nyǵaıtylyp jatyr. Qazirgi ýaqytta Elek ózeni boıyndaǵy aýyldarda 17 shaqyrymdy quraıtyn bóget salynýda. Barlyq jumysty qazan aıynda aıaqtaý josparlanyp otyr. Jalpy oblysta sý tasqynynda 15 gıdrotehnıkalyq qurylys buzyldy. Qazir jobalar ázir, memlekettik saraptamada. Tabıǵı resýrstar jáne tabıǵatty paıdalanýdy retteý basqarmasy bógetter men gıdrotehnıkalyq qurylysty jóndeý jumystary qarasha aıyna deıin aıaqtalady dep otyr, - dep habarlady Aqtóbe oblysy ákiminiń baspasóz qyzmeti.
Óńir basshysy Ashat Shaharov memlekettik organdar men merdiger mekemelerge qurylys jumystaryn normatıvke saı ýaqytyly, sapaly tapsyrýdy mindettedi.
- Aqtóbe oblysynda 22 eldimeken sý tasqynynan zardap shekti. Byltyr aýyldardy topan sýdan qorǵaıdy dep bastaǵan jáne bıyl jasalatyn 25 joba bar. Sonyń jumystaryn retke keltirý qajet. Josparǵa saı, aldyn ala ári jyldam qımyldap, merziminde qurylysty bitirý kerek. Áıtpese úlken sý kelgende qaıtadan saldarymen kúresýimiz múmkin. Tótenshe jaǵdaılar departamenti, Tabıǵı resýrstar jáne tabıǵatty qorǵaý departamenti, Memlekettik sáýlet-qurylys baqylaý basqarmalary, aýdan ákimdigi men merdiger kompanııalar bul máseleni únemi nazarda ustap, qadaǵalap, jumystardy kúsheıtýi tıis, - dedi Ashat Shaharov.
Mártók aýdanynda úsh aýyl tabıǵı apattan zardap shegip, saldarynan 69 aýlaǵa sý kirdi. Degenmen munda tótenshe jaǵdaı jarııalanbady. Sarjansaı aýylyndaǵy bir úı jáne Saryjar aýylynda úsh úı tehnıkalyq tekserý nátıjesinde apattyq jaǵdaıda dep tanyldy. «Bolat Ótemuratov qory» arqyly úı satyp alynǵan. Qalǵan eki otbasy jańa úıge kóshý úshin qujattaryn daıyndap jatyr. Sonymen qosa, 45 otbasy 100 AEK áleýmettik birjolǵy tólem aldy.
Eske salsaq, kóktemgi sý tasqyny kezinde buzylǵan bógetterdi jóndeýge 3 mlrd teńge qajet.
