Aqtóbede blokbeketterdiń jumysynan kemshilikter anyqtaldy
AQTÓBE. QazAqparat – Aqtóbede blokbeketter tek ruqsat qujaty bar júrgizýshilerdi ótkizip jatyr. Sybaılas jemqorlyqqa qarsy is-qımyl agenttiginiń oblystyq departamenti bes bekettegi jumys barysyn baqylady, dep habarlaıdy QazAqparat tilshisi.
Sybaılas jemqorlyqqa qarsy is-qımyl agenttiginiń oblystyq departamenti, arnaıy monıtorıngtik top, «Aqtóbe – adaldyq alańy» jobalyq keńsesi 5 sanıtarlyq blokbekette boldy. Beketter halyqaralyq, respýblıkalyq tasjoldarda ornalasqan.
«Qobda aýdanyna qarasty joldaǵy blokbekette polıtsııa men áskerı qyzmetshiler uzaq ýaqytqa jaramdy maskalarmen qamtamasyz etilmegen. Internet álsiz bolǵan soń qolda bar planshetterdiń júktemesi artyp, kezek kóbeıgen. Polıtsııa men ákimdik bir adamdy bólek-bólek tirkeıdi. Bul da ýaqyt alady. Monıtorıng kezinde 50 kóliktiń kezek kútip turǵany anyqtaldy», - dedi «Aqtóbe – adaldyq alańy» jobalyq keńsesiniń baspasóz qyzmetinen.
Aıta keteıik, «Aqtóbe – Bogoslovka – Shubarqudyq» tasjolynyń Sazdy blokbeketinde adamdardy tirkeýge arnalǵan planshetterdi qýattaıtyn qurylǵy qarastyrylmaǵan. Al «Aqtóbe - Mártók» trassasynda júrgizýshiler men jolaýshylardy tekseretin medıtsına qyzmetkeri joq.
«Aqtóbe – adaldyq alańy» jáne arnaıy monıtorıngilik top anyqtalǵan kemshilikter týraly oblys ákiminiń birinshi orynbasary Nurjaýǵan Qalaýovqa málimet berildi. Aldaǵy ýaqytta taǵy da tekserý bolady», - dedi baspasóz qyzmetinen.
