Aqtóbede blokbeketten ótken kólik jolaýshysynan qarý tabyldy

AQTÓBE. QazAqparat – Aqtóbede ótken túni komendanttyq saǵat tártibin buzǵan 83 adam ákimshilik jaýapqa tartyldy. Al blokbeketten ótken kólik jolaýshysynan qarý tabyldy, dep habarlaıdy QazAqparat tilshisi.

Quqyq qorǵaý organdarynyń qyzmetkerleri qoǵamdyq tártipti jáne azamattardyń qaýipsizdigin qamtamasyz etý úshin kúsheıtilgen rejımde jumysyn jalǵastyryp jatyr. Oblystaǵy jaǵdaı polıtsııanyń tolyq baqylaýynda.

«Ótken túni komendanttyq saǵatty buzǵany úshin polıtsııa bólimderine 115 azamat jetkizildi. Onyń 83 ákimshilik jaýapqa tartyldy (30-y qamaýǵa alyndy, 9-yna aıyppul salyndy, 20-yna eskertý berildi). Sonymen qatar qazirgi ýaqytta 3 adam qamaýda otyr. Taǵy 4 adamǵa qatysty bultartpaý sharasy qarastyrylyp, sotqa deıin tergeý jalǵasyp jatyr», - dedi oblystyq PD baspasóz qyzmetiniń jetekshisi Erbolat Sarqulov.

Aqtóbe qalasynyń jáne aýdan ortalyqtarynyń shyǵa berisinde 10 blokbeket ornatylǵan. Onda polıtsııa qyzmetkerleri men áskerıler qujattar men kólik ishin tekseredi.

«10 qańtar kúni blokbekette 40 jastaǵy júrgizýshiniń basqarýyndaǵy «Vaz-2140» avtokóligi toqtatyldy. Júrgizýshiniń tanysynyń qolynda 12 kalıbrli tegis uńǵyly eki myltyq bolǵan. Qarý ıesi ákimshilik jaýapqa tartyldy», - dedi Erbolat Sarqulov