Aqtóbede bilim salasynyń jemqorlyqpen aınalysqan qyzmetkerleri sotta sońǵy sózin aıtty

AQTÓBE. KAZINFORM - Sottalýshylardyń úsheýi óz isine ókinip, bas bostandyǵynan aıyrmaýdy surady. Al bireýi qysym kórgenin, májbúr bolǵanyn aıtty.

Aqtóbe oblysynyń bilim salasynda sapany qamtamasyz etý departamenti bóliminiń basshysyna jáne Aqtóbe qalasy № 74 orta mektep dırektory, Narqyzyl negizgi orta mektebiniń dırektory men Yrǵyz aýdandyq bilim bóliminiń sektor meńgerýshisine qatysty is aıaqtalýǵa jaqyn. Olarǵa Qylmystyq kodekstiń «Para alý», «Para berý», «Paraqorlyqqa deldal bolý» baptary boıynsha aıyp taǵylyp otyr. Búgin sottalýshylar sońǵy sózderin aıtty.

- Úsh kámelettik jasqa tolmaǵan balam bar. Densaýlyǵy aýyr ata-anam qolymda. Іsime ókinemin, - dedi Aqtóbe oblysynyń bilim salasynda sapany qamtamasyz etý departamenti bóliminiń basshysy Asqar Kemeshov.

Narqyzyl negizgi orta mektebiniń dırektory men Yrǵyz aýdandyq bilim bóliminiń sektor meńgerýshisi de ózi isine ókinip, bas bostandyǵynan aıyrmaýdy surady.

Al Aqtóbe qalasy № 74 orta mektep dırektory ózine qysym jasalǵan soń osy áreketke barǵanyn, jazany sol adam tartýy kerek ekenin aıtty. 

- Psıhologııalyq qysym arqyly táýeldilik sezimin qalyptastyrdy. Fılologııalyq-psıgologııalyq sot saraptamasy da meniń qorqytý, qysym, baǵynyshty jaǵdaıda bolǵanymdy, psıhologııalyq májbúrleý jaǵdaıynda áreket jasaǵanymdy aıtty. 

Parany qorqytý ne májbúrleý nátıjesinde bergen adam para berýshi bolyp eseptelmeıdi,- dedi sottalýshy. 

Eske salsaq, Aqtóbe oblysynyń bilim salasynda sapany qamtamasyz etý departamenti bóliminiń basshysy birneshe ret para alǵan. Ol qaıta attestatsııalaý kezinde dırektorlardan 50-70 myń teńge surap, óz qajetine jumsaǵan.