Aqtóbede bilim berý uıymdaryn jóndeýge 5 mlrd teńdegen astam qarjy jumsalady
AQTÓBE. KAZINFORM – Kúrdeli jóndeý 19 bilim berý uıymyna júrgiziledi. Ony jóndeýge oblystyq bıýdjetten 5,4 mlrd teńge qarjy bólindi.
Aqtóbede 2025-2026 oqý jyldaryna daıyndyq júrip jatyr. Barlyǵy 19 bilim berý uıymynyń 11-i mektep, 5-i balabaqsha, 2-eýi kolledj jáne bir qosymsha bilim berý uıymy. Búginde jumystyń 70% astamy aıaqtaldy.
- Renovatsııa baǵdarlamasy boıynsha 7 bilim berý uıymyna jóndeý júrgizilip jatyr. Olardyń úsheýi Aqtóbe qalasynan, qalǵandary Hromtaý men Muǵaljar aýdandarynda. Baǵdarlamaǵa sáıkes mektepterdiń materıaldyq-tehnıkalyq bazasy tolyq qaıta jańarady. Ashana men sport zaly, pándik kabınetteri túgel qaıta jabdyqtalady, - dedi Aqtóbe oblystyq bilim basqarmasynyń basshysy Bulbul Kúzembaeva.
Sonymen birge Aqtóbe qurylys-tehnıkalyq kolledji men №4 Embi mektebine jóndeý júrgiziledi. Qarjy shilde aıynda bólinip, qazir merdiger anyqtaý jumysy júrip jatyr.
- Jańa oqý jylynda balalardyń bilim alýyna esh kedergi bolmaıtyndaı jaǵdaı jasalady. Sonymen birge barlyq bilim berý uıymynda jóndeý júrip jatyr. Byltyr jylý júıesi syr bergen, qatty jel kezinde shatyry ushyp ketken problemalyq nysandar boldy. Sondaı 8 bilim berý uıymyna jóndeý júrgizý úshin bıýdjetten qosymsha 1,2 mlrd teńge bólindi, - dedi Bulbul Kúzembaeva.
Jalpy oblysta bıýdjettik uıymdar úshin jylytý maýsymyna 22,4 myń tonna kómir, 1270 tonna dızel otyny alynady.
Eske salsaq, Aqtóbede áýejaıdyń ushý-qoný jolaǵyndaǵy plıtalar aýystyrylady. Barlyǵy 1200 plıta jańarady.