Aqtóbede bilim basqarmasy burynǵy úsh esepshini sotqa berdi
AQTÓBE. KAZINFORM — Úsheýi de ózderiniń, muǵalimderdiń atyna artyq aqsha aýdaryp, ony óz qajetine jumsap otyrǵan. Oblystyq bilim basqarmasy shyǵyndy óndirip alý úshin sotqa aryz túsirip, jeńip shyqty.
Іs Shalqar aýdandyq sotynda qaraldy. Aqtóbe oblystyq bilim basqarmasy jábirlenýshi dep tanylyp, úsh esepshige Qylmystyq kodekstiń «Senip tapsyrylǵan bóten múlikti ıemdenip alý nemese talan-tarajǵa salý» baby boıynsha aıyp taǵyldy.
Shalqar qalalyq № 5 mektep-lıtseıiniń bas esepshisi bolǵan K.Ábdikárimova bilim ordasynyń satyp alýlar jónindegi esepshisi A.Sherýbaeva jáne S. Jıenǵazına birigip, aıla-amalǵa kóshedi. Sottalýshy K.Ábdikárimova 2021 jyly júktiligine baılanysty demalysqa shyqqan. Ol óz ornyna kelgen bas esepshiniń «Qazynashylyq klıent» júıesi jáne «Parýs» baǵdarlamasy arqyly durys jumys isteı almaıtynyn bilip, A.Sherýbaeva jáne S. Jıenǵazınaǵa usynys aıtady. Sóıtip úsheýi ózderine jáne úshinshi tulǵalardyń atyna jalaqy aýdarýǵa kelisedi. Eger qylmys áshkere bolsa, qatelik dep esep berýdi josparlaǵan. 2021 jyly K.Ábdikárimova mekteptiń qazaq tili páni muǵaliminiń rekvızıtterin paıdalanýdan bastaıdy. Oǵan «mekteptiń qajettiligi úshin» dep túsindiredi. Sengen muǵalimder esepshottaryndaǵy aqshany qolma-qol alyp, sottalýshylarǵa bergen. Uıymdasqan top mektep dırektorynyń ETsQ paıdalanady. Sóıtip 2021 jyldyń mymyry men 2024 jyldyń shilde aıy aralyǵynda bıýdjettiń ondaǵan myń aqshasyn ıemdenip, talan-tarajǵa salyp, jymqyrǵan.
Sot kabınetindegi aqparatqa súıensek, is qysqartylǵan tártippen qaralǵan. Sottalýshy K.Ábdikárimova kinásin ishinara moıyndady. Aqshany úı jóndeýge, balasyn emdeýge jáne otbasy qajettiligine jumsaǵan. Sottalýshy A.Sherýbaeva aıyppen kelispeı, kinásin moıyndamady. Bas esepshi K.Ábdikárimovanyń onlaın jumys istegenin, onyń tapsyrmasymen «mektep qajettiligi úshin» dep aýdarǵan aqshany qolma-qol sheship aparǵanyn jetkizdi. Sonymen birge sottalýshy S.Jıenǵazına da kinásin moıyndamady.
Shalqar aýdandyq bilim bólimi qylmystyq is qozǵalǵanǵa deıin artyq aýdarǵan 13 mıllıon teńgeni keri qaıtarǵan. Keıin esepshilerdiń bárin jumystan shyǵaryp, mektep dırektoryna qatań sógis bergen. Jalaqynyń artyq mólsherde negizsiz aýdarylǵany aýdıtorlyq tekserý kezinde anyqtaldy.
Sot úkimimen K.Ábdikárimova Qylmystyq kodekstiń 189-baby 4-bóligi 2-tarmaǵymen kináli dep tanylyp, túpkilikti 8 jyl merzimge bas bostandyǵynan aıyrý jazasy taǵaıyndaldy. Kishkentaı balasy bolǵan soń jazasyn tek úsh jyldan keıin óteıdi. A.Sherýbaeva men S. Jıenǵazına 7 jylǵa bas bostandyǵynan aıyryldy. Olar da jazasyn úsh jyldan keıin ótemek. Sonymen birge Aqtóbe oblystyq bilim basqarmasynyń azamattyq talap aryzy qanaǵattandyryldy. Úsh sottalýshy 43 230 582 teńge materıaldyq zalaldy óteýi tıis.
Aıta keteıik, úsh esepshi jumystan shyqqan soń ózge kommýnaldyq mekemege jumysqa ornalasqan.
Eske salsaq, byltyr Shalqar aýdanyndaǵy № 5 mektep lıtseıinde aýdıtorlyq tekserý júrgizildi. Nátıjesinde 51 400 000 teńge bolatyn buzýshylyq deregi anyqtaldy.
