Aqtóbede bıznesti qoldaýǵa 35 mıllıard teńge jumsalady
AQTÓBE. QazAqparat - Bıyl shaǵyn jáne orta bıznesti qoldaý úshin 35 mlrd teńge qarastyrylady. Barlyǵy 2 myń bıznes sýbektisine qoldaý kórsetý josparlanýda, dep habarlaıdy QazAqparat tilshisi.
2019 jyldyń qorytyndysy boıynsha oblysta belsendi jumys istep turǵan shaǵyn jáne orta bıznes sýbektileriniń sany 8,6% artty. Qazir 60 myńǵa jetip otyr. «Bıznestiń jol kartasy-2025», «Qarapaıym zattar ekonomıkasy», «Eńbek» shaǵyn nesıeleý, EQQDB qarjylyq emes qoldaý baǵdarlamalary aıasynda bıyl 35 mlrd teńge qarastyrylyp, osy qarjy aıasynda keminde 2 myń bıznes sýbektisin qoldaý josparlanýda.
«Qyzmet kórsetý, tamaq ónerkásibi salasy jaqsy damyp keledi. Máselen, memlekettik baǵdarlamalar aıasynda balalar men eresekterge arnalǵan zamanaýı stomatologııa kabıneti ashyldy. 2016 jyly nesıe alyp, «Bıznestiń jol kartasy-2025« memlekettik baǵdarlamasy aıasynda nesıe paıyzyn tómendetýge jáne kepildik alýǵa múmkindik berildi. Al fıtnes ortalyǵy kardıozalǵa arnalǵan jabdyqtardy satyp alý jáne qurylys-montajdaý jumystaryn ótkizý maqsatynda 2013 jyly memlekettik baǵdarlama boıynsha jeńildetilgen nesıe jelisin rásimdedi. 2019 jyly kompanııa óz qyzmetin keńeıtti. «Eńbek» baǵdarlamasy boıynsha jyldyq ústemeaqysy 6% nesıe berildi», - dedi Aqtóbe oblysynyń kásipkerlik basqarma basshysy Qaırat Raıymqulov.
Baspasóz týry kezinde dámhana, naýbaıhana jumysy tanystyryldy.
«Kóliktiń qosalqy bólshekterine, dońǵalaqtaryna arnalǵan dúken de memlekettik baǵdarlamalardyń ıgiligin kórip otyr. 2017 jyly naýbaıhana ıesi «BJK - 2025» baǵdarlamasy aıasynda ǵımarat satyp alyp, qurylys-montaj jumystaryn júrgizdi.
EQQDB qoldaýymen kásipkerler bıznesti júıeli basqarýdy engizdi, maqsatty aýdıtorııany anyqtady, jańa brend jasady, marketıngtik taldaý júrgizdi, bıznes-protsesterdi avtomattandyrdy, - dep atap ótti Eýropalyq qaıta qurý jáne damý bankiniń ókili Aıbek Orazbaev.
