Aqtóbede «Bızneske shekteý joq» jobasy qolǵa alyndy
AQTÓBE. QazAqparat - Aqtóbede bızneske kedergi keltiretin shekteýlerdi joıyp, qıyndyqtardy sheshýge arnalǵan «Bızneske shekteý joq» jobasy iske asyrylady, dep habarlaıdy QazAqparat tilshisi.
Aqtóbe oblysynda aı saıyn kásipkerler men memlekettik mekemeler arasyndaǵy kedergilerdi joıý suraqtary qaralady. Ótken jyly shaǵyn jáne orta bızneske kedergi keltiretin 32 normatıvtik-quqyqtyq akt anyqtalsa, onyń ishinde jergilikti jerde sheshimi tabylatyn qıyndyqtar da bar. Jumys ári qaraı jalǵasatyn boldy. Bıyl Aqtóbe oblystyq kásipkerlik basqarmasy, «Atameken» UKP men kásipkerler birlesip, «Bızneske shekteý joq» jobasy aıasynda jumys isteıdi.
«Ekonomıkanyń barlyq salasy boıynsha ósim bolýy kerek. Bıyl biz Aqtóbe oblysynda bıznesti damytýǵa kedergi bolatyn tosqaýyldardy joıý úshin barlyq qajetti sharalardy jasaımyz. Qazir biz «Atameken» UKP-men birigip jumys istep, bıznespen jumysqa taldaý júrgizip jatyrmyz. Barlyq ýákiletti baqylaýshy jáne quqyq qorǵaý organdary bıznesti damytýǵa kedergi bolatyn máselelerdi joıý úshin muqııat taldaý jasaýy tıis. Kásipkerlikti damytýdyń barlyq ortalyqtary jumys isteýi kerek»,- dedi oblys ákimi Berdibek Saparbaev.
Aıta keteıik, Aqtóbe oblysynda 63 myńnan astam shaǵyn jáne orta bıznes sýbektisi tirkeldi. Olar ótken jyly jalpy somasy 492,7 mlrd. teńgeni quraıtyn ónim óndirdi. Óńirde bul salada 135 myńnan astam adam jumys istep júr.
